25 jeltoqsanda Aqtóbede Alash qairatkerleri beinelengen "Azattyqtyń aq tańy" memorialdyq kesheni ashyldy, - dep habarlaidy Tengrinews.kz agenttigi qala ákimdiginiń baspasóz qyzmetine silteme jasap.
Keshenniń ashylýynda "Alash urany" gimni oryndalyp, "Alash" partiiasynyń týy kóterildi. Sharaǵa oblys ákimi Ońdasyn Orazalin, Temirbek Júrgenov pen Uzaqbai Qulymbetovtiń týystary, qoǵam qairatkerleri men óńirdiń ziialy qaýym ókilderi qatysty.
Memorialdyq keshenge "Alash" partiiasynyń Álihan Bókeihan, Ahmet Baitursynov, Mustafa Shoqai, Halel Dosmuhamedov, Mirjaqyp Dýlatov, Jahanshy Dosmuhamedov, Maǵjan Jumabaev, Teljan Shonanov, Temirbek Júrgenov, Uzaqbai Qulymbetov, Muhamedjan Tynyshbaev syndy belgili qairatkerleriniń barelefti beineleri bar.
Áliia Moldaǵulova men Táýelsizdik dańǵyldarynyń qiylysynda ornalasqan relefti kompozitsiianyń biiktigi 5 metr, al uzyndyǵy 7 metr. Joba avtory - músinshi Jeńis Jubanqosov.
"Búgingi urpaq Táýelsizdik úshin kúresken azamattardy ulyqtap, olardyń taýqymetke toly taǵdyrynan taǵylym alýǵa tiis. Tarihtan taǵylym almaǵandar úshin qasyret árdaiym qaitalanady. Búgingi "Azattyqtyń aq tańy" tarihi kesheni Táýelsizdik jolynda kúresken Alash qairatkerlerine, olardyń murasyna degen adaldyǵymyzdy ańǵartý maqsatynda ashylyp otyr!", - dedi Ońdasyn Orazalin quttyqtaý sózinde.
Shara sońynda qonaqtar memorialdy keshenge gúl shoqtaryn qoidy.
