Aqtóbe qalasynda 18 jastaǵy sportshyny atyp ketti, dep habarlaidy "Ult aqparat".
Aqtóbe qalasynda kiokýshinkai karateden Aziia Kýboginiń iegeri Dáýlet Hairollany atyp ketti. Bul oqiǵaǵa qatysty oblystyq politsiia departamenti baspasóz qyzmetiniń jetekshisi Erbolat Sarqulov shaǵyn aqparat taratty.
«4-aqpan kúni bir top jas tanys qyzdyń týǵan kúnin atap ótý úshin qalanyń eski bóliginde úidi jaldaǵan. Shara barysynda jastar arasynda qaqtyǵys bolyp, onyń saldarynan atys qarýyn qoldaný arqyly kisi óltirý deregi tirkeldi. Jedel-izdestirý sharasy barysynda kúdikti anyqtalyp, ustaldy. Ol kisi óltirgenin tolyq moiyndap, qylmys quralyn jasyrǵan jerdi kórsetti. Kisi óltirý faktisi boiynsha QR QK 99-babymen sotqa deiingi tergeý júrgizilip jatyr. Kúdikti Aqtóbe qalasyndaǵy ýaqytsha ustaý izoliatoryna qamaldy», - dep jazylǵan baspasóz habarlamasynda.
Aita keteiik, kóz jumǵan Dáýlet Hairolla Aqtóbe qalasynyń turǵyny. Ol mektep bitirgen soń sport salasyn tańdap, joǵary oqý ornyna tústi. Kishkentai kezinen sportty serik etken bozbala oblystyq qurama sapynda boldy.
«Qazaqstan birinshiliginiń kúmis júldegeri, Aziia Kýboginiń iegeri, Qazaqstan Kýboginiń iegeri, qońyr belbeý iegeri. 18 jastaǵy jigit birer kúnnen soń Qazaqstan Kýbogine barýy tiis edi.
«El namysyn qorǵar úzdik sportshymyzdan aiyrylyp qalǵanymyzdy búgin tańda estidim», - dedi oblystyq dene shynyqtyrý jáne sport basqarmasynyń basshysy Evgenii Goncharov.
Dáýlet Hairollany 2013 jyldan beri Álisher Qulyntai jattyqtyrdy. Qaiǵyly oqiǵany estigende eseńgirep qalǵanyn aitty jattyqtyrýshy.
«Dáýlet komandanyń úzdigi boldy. Kóp úmit artyp edik. Ózge zamandastaryna úlgi bolǵan sportshydan qapyda aiyrylyp qaldyq. Baýyrmal, ashyq minezdi jigittiń ortamyzda joq ekenin estigende qatty qaiǵyrdym», - dedi ol.
