اقتٶبە قالاسىندا 18 جاستاعى سپورتشىنى اتىپ كەتتٸ, دەپ حابارلايدى "ۇلت اقپارات".
اقتٶبە قالاسىندا كيوكۋشينكاي كاراتەدەن ازييا كۋبوگٸنٸڭ يەگەرٸ دەۋلەت حايروللانى اتىپ كەتتٸ. بۇل وقيعاعا قاتىستى وبلىستىق پوليتسييا دەپارتامەنتٸ باسپاسٶز قىزمەتٸنٸڭ جەتەكشٸسٸ ەربولات سارقۇلوۆ شاعىن اقپارات تاراتتى.
«4-اقپان كٷنٸ بٸر توپ جاس تانىس قىزدىڭ تۋعان كٷنٸن اتاپ ٶتۋ ٷشٸن قالانىڭ ەسكٸ بٶلٸگٸندە ٷيدٸ جالداعان. شارا بارىسىندا جاستار اراسىندا قاقتىعىس بولىپ, ونىڭ سالدارىنان اتىس قارۋىن قولدانۋ ارقىلى كٸسٸ ٶلتٸرۋ دەرەگٸ تٸركەلدٸ. جەدەل-ٸزدەستٸرۋ شاراسى بارىسىندا كٷدٸكتٸ انىقتالىپ, ۇستالدى. ول كٸسٸ ٶلتٸرگەنٸن تولىق مويىنداپ, قىلمىس قۇرالىن جاسىرعان جەردٸ كٶرسەتتٸ. كٸسٸ ٶلتٸرۋ فاكتٸسٸ بويىنشا قر قك 99-بابىمەن سوتقا دەيٸنگٸ تەرگەۋ جٷرگٸزٸلٸپ جاتىر. كٷدٸكتٸ اقتٶبە قالاسىنداعى ۋاقىتشا ۇستاۋ يزولياتورىنا قامالدى», - دەپ جازىلعان باسپاسٶز حابارلاماسىندا.
ايتا كەتەيٸك, كٶز جۇمعان دەۋلەت حايروللا اقتٶبە قالاسىنىڭ تۇرعىنى. ول مەكتەپ بٸتٸرگەن سوڭ سپورت سالاسىن تاڭداپ, جوعارى وقۋ ورنىنا تٷستٸ. كٸشكەنتاي كەزٸنەن سپورتتى سەرٸك ەتكەن بوزبالا وبلىستىق قۇراما ساپىندا بولدى.
«قازاقستان بٸرٸنشٸلٸگٸنٸڭ كٷمٸس جٷلدەگەرٸ, ازييا كۋبوگٸنٸڭ يەگەرٸ, قازاقستان كۋبوگٸنٸڭ يەگەرٸ, قوڭىر بەلبەۋ يەگەرٸ. 18 جاستاعى جٸگٸت بٸرەر كٷننەن سوڭ قازاقستان كۋبوگٸنە بارۋى تيٸس ەدٸ.
«ەل نامىسىن قورعار ٷزدٸك سپورتشىمىزدان ايىرىلىپ قالعانىمىزدى بٷگٸن تاڭدا ەستٸدٸم», - دەدٸ وبلىستىق دەنە شىنىقتىرۋ جەنە سپورت باسقارماسىنىڭ باسشىسى ەۆگەنيي گونچاروۆ.
دەۋلەت حايروللانى 2013 جىلدان بەرٸ ەلٸشەر قۇلىنتاي جاتتىقتىردى. قايعىلى وقيعانى ەستٸگەندە ەسەڭگٸرەپ قالعانىن ايتتى جاتتىقتىرۋشى.
«دەۋلەت كوماندانىڭ ٷزدٸگٸ بولدى. كٶپ ٷمٸت ارتىپ ەدٸك. ٶزگە زامانداستارىنا ٷلگٸ بولعان سپورتشىدان قاپىدا ايىرىلىپ قالدىق. باۋىرمال, اشىق مٸنەزدٸ جٸگٸتتٸڭ ورتامىزدا جوق ەكەنٸن ەستٸگەندە قاتتى قايعىردىم», - دەدٸ ول.
