Aqtóbede sozylmaly aýrýǵa shaldyǵyp, esepte turǵan naýqastarǵa vaktsina egilýde, dep habarlaidy "Ult aqparat".
Aqtóbe oblysy boiynsha ótken táýlikte 61 adam koronavirýs infektsiiasyna shaldyqty. Onyń basym bóligi Aqtóbe qalasynyń turǵyny. Sonymen birge Qobda, Mártók, Temir aýdandarynda da virýs juqtyrǵan naýqastar dáriger kómegine júgindi. Óńirlik kommýnikatsiialar qyzmetinde ótken brifingte oblystyq densaýlyq saqtaý basqarmasynyń basshysy Rústem Isaev immýndaý jumysyna toqtaldy.
«Oblysqa 6300 doza vaktsina jetkizildi. Qazir qaladaǵy emhanalarǵa 300 doza vaktsinadan berildi. Sonymen birge aýdandarǵa da jiberildi. Jasy 18-den asqan kez kelgen turǵyn ýchaskelik dárigerine habarlasyp, vaktsina qabyldai alady. 80 jastaǵy adamnyń da qabyldaýyna bolady. Dál qazirgi kezde sozylmaly aýrýǵa shaldyǵyp, esepte turǵandarǵa basymdyq berilgen. Jappai immýndaý kezinde almatylyq áriptesterimizdiń tájiribesine súienip, iri saýda oryndarynda da vaktsina berýimiz múmkin. Ol jerlerge jyljymaly meditsinalyq keshender qoiylady. Ótken jyly 6 keshen satyp alyndy», - dedi Rústem Isaev.
Shamamen 10 sáýirden keiin ǵana jappai egý jumysy bastalýy múmkin. Óńir iri kólemde vaktsinanyń jetkizilýin kútip otyr.
