Aqtóbe turǵyny sot arqyly “Jolaýshylar tasymaly” aktsionerlik qoǵamynan las vagondar úshin moraldyq ótemaqy óndirip aldy, dep habarlaidy "Ult aqparat".
"Informbiýro" jańalyqtar qyzmetiniń habarlaýynsha, byltyr tamyzda er adam kámeletke tolmaǵan qyzymen Atyraý-Aqtóbe baǵytynda qatynaityn poiyzǵa bilet satyp alady. Poiyzǵa mingennen keiin ol vagon sanitariia talaptaryna sai emes ekenin kórgen.
Jolaýshylar shań, kir, sondai-aq krannan tot basqan sý aǵyp jatqanyna ashýlandy. Olar vagon brigadirine ornyn aýystyrý nemese basqa jerge kóshirý týraly ótinish aitqanymen, brigadir ótinishti oryndaýdan bas tartqan. Sóitip er adam kólik politsiiasynyń qyzmetkerlerin shaqyrady. Oqiǵa ornyna kelgen qyzmetkerler sanitariia talaptary buzylǵanyn baiqap sýretke jáne videoǵa túsirip áketken. Osydan keiin talapker sotqa júginip, biletterdiń qunyn qaitarýdy jáne moraldyq shyǵyndy óteýdi talap etti.
"Aqtóbe oblysynyń kámeletke tolmaǵandar jónindegi mamandandyrylǵan aýdanaralyq sotynyń biyl 12 naýryzdaǵy sheshimimen "Jolaýshylar tasymaly" aktsionerlik qoǵamynan eki jolaýshynyń árqaisysyna 50 myń teńgeden moraldyq shyǵyn jáne 200 myń teńge ókildik shyǵys óndirildi. Sot sheshimi zańdy kúshine engen joq", – dep habarlady Aqtóbe oblystyq sotynyń baspasóz qyzmetiniń basshysy Aijamal Súndet.
