Foto: Tengrinews.kz
Aqtóbe qalasynyń Ábilqaiyr han dańǵyly boiynda ornalasqan dámhana mańynda tóbeles bolyp, bir adam pyshaq jaraqatynan kóz jumdy. Qazirgi kezde kúdikti ustaldy, qamaýda otyr, dep habarlaidy QazAqparat.
Oqiǵa 3 shilde saǵat 6:35-te tirkelgen. Aqtóbe qalasy PB jedel basqarý ortalyǵyna Ábilqaiyr han dańǵylyndaǵy №89 úidiń janynda tóbeles bolyp jatqany týraly habarlama túsken.
«Politsiia jasaǵy pyshaq jaraqatyn alǵan er adamdy tapty. Jedel járdem ony Aqtóbe qalasynyń kópsalaly aýrýhanasyna jetkizdi. Alaida, jábirlenýshi alǵan dene jaraqatynan qaitys boldy. Patrýldik politsiia qyzmetkerleri osy qylmysty jasady degen kúdikpen 37 jastaǵy er adamdy anyqtap, ustady. Qylmystyq kodekstiń «Kisi óltirý» baby boiynsha sotqa deiingi tergeý júrgizilip jatyr. Kúdikti ýaqytsha ustaý izoliatoryna qamaldy», - dep habarlady oblystyq PD baspasóz qyzmetiniń jetekshisi Erbolat Sarqulov.
Aita keteiik, ótken aptada óńirde 173 qylmys tirkelgen. Onyń ishinde 56-sy - jeke múlikti urlaý, 29-y - alaiaqtyq jáne 6 buzaqylyq deregi.
