Aqtóbe oblysy Áiteke bi aýdanynyń ortalyǵy Komsomol aýylynda gaz jarylysynan úi qirap qaldy. Adamdar din aman. Olar qaýipsiz jerge kóshirilip, ýaqytsha baspana berildi, dep habarlaidy QazAqparat tilshisi.
«Oqiǵa bolǵan jerge baryp, jaǵdaimen tanystym. Adamdarǵa esh qaýip tóngen joq. Aldyn ala málimet boiynsha, gaz qazandyǵynan esh aqaý bolmady. Tek gaz plitasynan gaz shyǵyp ketip, ol jinalyp, úige jalǵanǵan qurylysty qiratyp jibergen. Arnaiy komissiia qurylyp, jumys júrgizip jatyr. Otbasyna ýaqytsha úi berilip, kóshirildi. Olarǵa kómek beriledi. Qalpyna keltirý jumystaryna jumysshylar kómektesedi», - dedi Áiteke bi aýdanynyń ákimi Málimbet Ibrashev.
Al úisiz qalǵan aýyl turǵyny Rýslan Tájimanovtyń aitýynsha, qazir ol 4 balasymen páter jaldap turyp jatyr.
«Oqiǵa jeksenbi kúni boldy. Bári din aman. Jarylystyń neden bolǵanyn bilmeimiz. Ákimdik kelip qarady, ýaqytsha baspana berdi. Biraq berilgen úide sý, jylý, ájethana da joq, balalardyń mektebine alys. Sondyqtan páter jaldadyq. Úide anam, qaryndasym, barlyǵy 8 janbyz. Týma-týystarym kómektesip jatyr. Kóktemge qaita salýǵa týra kelip tur», - dedi ol.
