Aqtóbe oblysynda Ulttyq sanaqqa interviýer retinde alynatyn adamdar vaktsina alǵan turǵyndar arasynan irikteledi. Aimaq ákimi Ońdasyn Orazalin Úkimet otyrysynda osyndai málimet aitty, dep habarlaidy QazAqparat.
«Jospar boiynsha oblys aýmaǵynda sanaq júrgizý úshin 155 nusqaýshy-baqylaýshy men 1 084 interviýer kerek. Búginde jumysqa ornalasýǵa niet bildirgen azamattarmen áńgimelesý júrgizilip jatyr. Sonymen birge ákimdik volonter men stýdentterdi interviýer retinde tartý jumysyn qarastyrýda. Koronavirýs infektsiiasynyń taralýyna jol bermeý úshin sanaq qyzmetkerleri vaktsina alǵandar arasynan irikteledi», - degen óńir basshysy Úkimet jiynynda aitylǵan kemshilikterdi joiýǵa tolyq múmkindik bar ekenin atady.
«Jalpy Ulttyq halyq sanaǵy naýqanyn mediasúiemeldeý boiynsha oblystyq telearnalarda, BAQ-ta beinerolikter kórsetildi jáne halyq arasynda túsindirý jumystary júrigizilip jatyr. Álihan Ashanuly ataǵan kemshilikterdi joiyp, jumysty keń jolǵa qoiýǵa barlyq múmkindik bar. Óńirde sanaqty sapaly ótkizý máselesi baqylaýda», - dedi Ońdasyn Orazalin.
Eske salsaq, Úkimet otyrysynda Premer-Ministrdiń birinshi orynbasary Álihan Smaiylov biylǵy sanaqqa 2009 jylǵydan 2,6 ese az qarjy jumsalatynyn aitqan bolatyn.
«Tsifrlyq tehnologiialardyń engizilýine, protsesti avtomattandyrýǵa jáne qaǵaz qujattyń ornyna planshetterdi qoldanýǵa bailanysty sanaq 2009 jylǵy sanaqtyń shyǵynyna qaraǵanda 2,6 ese arzan. Bul rette derekterdiń sapasy men aqparatty jinaý jedeldigi aitarlyqtai jaqsarady. Sanaq aiaqtalǵan soń planshetter mektepter men aýrýhanalarǵa beriledi. Sanaq júrgizý - búkil qoǵamnyń qatysýyn talap etetin aýqymdy is-shara. Sonymen birge, taldaý keibir óńirlerde, atap aitqanda Mańǵystaý oblysynda, Shymkent qalasynda, Aqtóbe jáne Qaraǵandy oblystarynda daiyndyq jumysy tiisti deńgeide júrgizilmei jatqanyn kórsetedi. Osyǵan bailanysty barlyq jergilikti atqarýshy jáne ortalyq memlekettik organdar Is-sharalar josparyn qatań ustanýy jáne belgilengen merzimderde ulttyq halyq sanaǵynyń sapaly júrgizilýin qamtamasyz etýi qajet», - dedi Álihan Smaiylov.
