Aqtóbede mal baǵýǵa shyqqan er adamǵa naizaǵai tústi, dep habarlaidy Ulysmedia.kz.
Oblystyq TJD baspasóz qyzmetiniń málimetinshe, oqiǵa 24 shilde saǵat 08:35-te bolǵan. TJD kezekshi-dispetcherlik qyzmetiniń pýltine Muǵaljar aýdany Embi qalasy Úshqatty saiynyń mańynda er adamǵa naizaǵai túskendigi jóninde habarlama kelip túsken.
«Zardap shegýshi Embi aýdandyq aýrýhanasyna jetkizildi. Qazirgi ýaqytta onyń jaǵdaiy turaqty. Derekter súiensek, 1981 jylǵy er adam maldy óriske aidap bara jatqan. Aqtóbe oblysy TJD turǵyndarǵa qaýipsizdik erejelerin saqtaýdy eskertedi. Kóbinese naizaǵai biik ǵimarattarǵa, aǵashtarǵa túsedi. Sondyqtan olardan 50-60 metr qashyqtyqta bolǵanyńyz durys. Qolshatyr naizaǵaidan qutqarmaidy, kerisinshe apat ákelýi múmkin. Sol sebepti, jalt oinap turǵan kezde qolshatyrdy ashýǵa bolmaidy. Naizaǵai oinap turǵanda telefonmen sóilespegenińiz durys. Sebebi naizaǵai kei kezde elektr baǵanalarynan ótedi», – delingen TJD habarlamasynda.
