Aqtóbe oblysynyń Mártók aýdanynda «Zárý» pantomen emdeý shipajaiy ashyldy. Saltanatty shara barysynda oblys ákimi Berdibek Saparbaev jobanyń jergilikti turǵyndardy saýyqtyrýǵa jáne oblys týrizminiń damýyna oń áserin tigizetinine senim bildirdi.
- Men osynda tek aqtóbelikter ǵana emes, sondai-aq Qazaqstan men Reseidiń kórshiles óńirleriniń turǵyndary da keledi dep oilaimyn. Qazirgi zamanǵy pantomen emdeý emhanasynyń ashylýy - dástúrli emes aýyl sharýashylyǵy men tabysty aimaqaralyq yntymaqtastyqty belsendi damytýdyń aiǵaǵy. Biz agrarlyq sektorda oblys úshin tańsyq óndiristiń túrlerin qoldaý arqyly ekonomikanyń buryn igerilmegen áleýetin paidalanyp, eń bastysy - azamattarymyzdy óz óndirisimizdiń paidaly ónimderimen qamtamasyz etemiz, - dep atap ótti Berdibek Saparbaev.
Sonymen qatar, aimaq basshysy jergilikti bilik dástúrli emes aýyl sharýashylyǵymen ainalysatyn AÓK sýbektileri úshin tolyq qoldaý kórsetedi dep sendirdi.
Aita keteiik, memlekettik qoldaý sharalarynyń birazy buǵy múiizimen emdeitin emhana-shipajaidyń eki qabatty ǵimaratynyń qurylysy men onyń janynda jumys jasap jatqan maral ósirý fermasyna da qoldanyldy. Jergilikti organdar Qazan aýylyna jaqyn mańdaǵy fermaǵa 700 gektar jáne shipajaiǵa taǵy 1 gektar jer bólgen. Kásipkerlikti biryńǵai qoldaý men damytýdyń «BJK-2020» baǵdarlamasy aiasynda paiyzdyq stavkany sýbsidiialaý arqyly 150 mln teńge kóleminde qaryz qarajaty berildi. Jobanyń jalpy quny – 450 mln teńge.
Shipajai Shyǵys Qazaqstan oblysynan ákelingen 150-den asa maral emdeý shikizatymen qamtamasyz etiletin bolady. Fermada barlyǵy 30 adam eńbek etpek. Keleshekte maral múiiziniń negizinde biologiialyq qospalar shyǵarý josparda bar.
Shipajaidyń alǵashqy kelýshileri 25 maýsymda keledi dep kútilýde. Pantoterapiia kýrsynyń uzaqtyǵy 5-10 kún.
Ashylý saltanatyna sondai-aq, respýblikalyq maral sharýashylyǵy palatasynyń tóraǵasy Nurlan Toqtarov ta qatysty. Ol aqtóbelikterdi ataýly oqiǵalarymen jáne Shyǵys Qazaqstannyń, endi Aqtóbe oblysynyń maral ósirý salasyn belsendi túrde damytqandary úshin quttyqtap, Berdibek Saparbaevqa atalmysh salanyń úzdigi tósbelgisin tabys etti.
