Aqtóbe oblysyn damytýǵa aldaǵy 5 jylda 567 mlrd teńge jumsalady. Bul týraly QR Ulttyq ekonomika ministri Áset Erǵaliev aitty, dep habarlaidy QazAqparat.
«Qaraýǵa Aqtóbe oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi jospary usynylyp otyr. Keshendi jospar Aqtóbe oblysy boiynsha Aktóbe aglomeratsiiasyn, munai-gaz jáne kólik infraqurylymyn, taý-ken metallýrgiia keshenin, ónerkásiptik kooperatsiiany, ǵylymi-meditsinalyq jáne bilim berý klasterin damytýdy kózdeitin 6 baǵyttan turatyn jáne 36 is-sharany qamtidy. Jospardy iske asyrýdyń jalpy somasy 567 mlrd teńgeni quraidy. Onyń ishinde respýblikalyq biýdjetten – 64,9 mlrd teńge, jergilikti biýdjetten – 7,4 mlrd teńge, jeke investitsiialar – 478,7 mlrd teńge, sondai-aq memlekettik-jekeshelik áriptestik arqyly 16,6 mlrd teńge»,- dedi ol.
Ministrdiń dereginshe, keshendi jospardyń birinshi bólimi Aqtóbe aglomeratsiiasynyń infraqurylymyn damytýǵa 119,6 mlrd teńge somasyna 13 investitsiialyq jobalardy qamtidy. Halyqtyń ómir súrý sapasyn arttyrý jáne jaǵdaiyn jaqsartý maqsatynda injenerlik-kommýnikatsiialyq infraqurylymdy damytý jónindegi jobalar iske asyrylatyn bolady. Sonymen qatar, Keshendi jospar aiasynda Aqtóbe qalasyndaǵy káriz-tazartý qurylystaryn jańǵyrtý jáne turǵyn úi qurylysy aýdandarynda injenerlik-kommýnikatsiialyq jelilerdi qamtamasyz etý josparlanyp otyr.
«Keshendi jospardyń ekinshi bólimi boiynsha munai-gaz salasynda gaz óńdeý keshenin salý, jańa ken oryndaryn igerý jáne rezervtik ken oryndaryn paidalanýǵa berýdi qamtamasyz etý, sondai-aq qiyn óndiriletin munaidy óndirý kezinde tehnologiialyq jańǵyrtýdy júrgizý josparlanýda. Úshinshi bólimde taý-ken metallýrgiia keshenin damytý boiynsha is-sharalardy iske asyrý kózdelýde. Jobalardy qarjylandyrý 48,3 mlrd teńge somasyna jeke investitsiialar esebinen júzege asyrylatyn bolady. Sondai-aq, keshendi josparda ónerkásiptik kooperatsiiany damytý boiynsha jobalar júzege asyrý josparlanǵan. Onyń ishinde 450 gektar indýstriialyq aimaqty qurý qamtylady», - dedi Áset Erǵaliev.
Onyń atap ótýinshe, besinshi bólim boiynsha kólik infraqurylymyn damytýǵa 11,1 mlrd teńgeni quraityn jobalardy júzege asyrý josparlanǵan.
«Aqtóbe oblysyndaǵy avtomobil joldaryn rekonstrýktsiialaý óńiraralyq bailanystardy nyǵaitýǵa septigin tigizedi. Aqtóbe qalasy elimizdiń batys bóligindegi ósý ortalyǵy jáne iri kólik toraby retindegi rólin kúsheitýge «Aqtóbe – Orsk» jáne «Aqtóbe qalasynyń ońtústik ainalma joly» siiaqty jobalar yqpal etetin bolady. «Aqtóbe – Hromtaý – Qarabutaq – Ulǵaisyn» jáne «Aqtóbe – Atyraý – Astrahan» avtomobil joldaryn qaita jańartýdy iske asyrý jaqsy jáne qanaǵattanarlyq jaǵdaidaǵy joldardyń úlesin 61-den 95 paiyzǵa deiin ulǵaitýǵa múmkindik beredi. Atalǵan jobalardy iske asyrý kórshiles óńirlermen jolaýshylar aǵyny men júk tasymalyn ulǵaitady. Osylaisha, Aqtóbe oblysynyń taýar ainalymy 2025 jylǵa qarai 1,5 esege – 2,3 trln teńgege deiin artady»,- dedi ministr.
Áset Erǵaliev keshendi jospardyń sońǵy bólimi boiynsha óńirdiń ǵylymi-meditsinalyq klasterin damytý aiasynda 8,1 mlrd teńgeniń jobalary qarastyrylatyndyǵyn aitady.
«Densaýlyq saqtaý jáne bilim berý júieleri qyzmetteriniń qoljetimdiligi men sapasyn arttyrý úshin qazirgi zamanǵy infraqurylym qurý kózdelgen. 25 densaýlyq saqtaý nysanyna kúrdeli jóndeý júrgiziledi. Kóp beiindi aýrýhana, balalar onkogematologiia ortalyǵy salynady. Sondai-aq densaýlyq saqtaý uiymdaryn joǵary tehnologiialyq meditsinalyq tehnikamen jabdyqtaý josparlanýda. Sonymen qatar Aqtóbe oblysy boiynsha 49 mektep jáne Aqtóbe qalasynda kolledj stýdentterine arnalǵan úsh jataqhana salý kózdelýde»,- dedi ol.
