"Aqbóbek-Vostok" balalar lageriniń tálimgerleriniń biri kámelettik jasqa tolmaǵandardy azǵyndady dep aiyptaldy, dep habarlaidy "Astana" telearnasy.
Tálimgerdiń ústinen jeti birdei balanyń ata-anasy politsiiaǵa aryzdanypty. Qazir arnaiy komissiia lagerdegi mán-jai anyqtap jatyr.
"Kámeletke tolmaǵandardy azǵyndyqqa itermeleý boldy ma, bolmady ma anyqtalyp jatyr. Almaty aýdany politsiiasy sotqa deiingi tergeý amaldaryn bastady. Tekserý barysynda barlyq jaǵdai anyqtalady. Bul isti prokýratýra qatań baqylaýǵa alady", - dedi Aqtóbe qalasy Almaty aýdanynyń prokýrory Jasulan Dáýlembaev.
Er balalar tobyna jetekshilik etken 22 jastaǵy tálimger jigit jumystan bosatylǵan. Ol Astanadaǵy joǵarǵy oqý ornynyń biriniń stýdenti eken. Úiinen eshqaida ketpeý týraly qolhat beripti.
Lager basshysy Aibolat Tashkenovtyń aitýynsha, tálimger jumystan shyǵarylǵan. Al ózge tálimgerler áriptesteriniń oǵash qylyǵyn baiqamaǵan.
«Ony tek jaqsy adam retinde tanimyn. Jaqsy maman, bilikti azamat. Nur - Sultan qalasyndaǵy «Shabyt» akademiiasynda kino jáne teatr akteri mamandyǵy boiynsha bilim alyp júr. Telearnada jumys istedi dep estidim», - dedi tálimger Ýálihan Kenjebaev.
Aqtóbe oblystyq bilim basqarmasynyń bólim basshysy Raihan Nurǵojaevanyń aitýynsha, lagerdegi 10-12 jastaǵy balalardy tálimger bi keshine jibermegen. Al jetkinshekter "bizdi urdy" dep shaǵymdanypty. Azǵyndyq týraly eshqandai málimet túsken joq, deidi bólim basshysy.
