QR Qarjy ministrligi Aqtóbe qalasy turǵynynyń vedomstvoǵa shaǵym túsirý sebepterin túsindirdi, dep habarlaidy "Ult aqparat" Qarjy ministrliginiń baspasóz qyzmetine silteme jasap.
Baspasóz qyzmeti taratqan málimetterge qaraǵanda, sot sheshimimen aqtalǵan azamatsha Diýsekenova J.B. moraldyq ziiandy óteýdi talap etip otyr.
Aqtóbe qalalyq soty J.B.Diýsekenovanyń 3 000 000 teńge mólsherindegi moraldyq ziiandy óteý týraly talap-aryzyn qarap jatyr. Aita keteiik, atalǵan is boiynsha Aqtóbe oblysynyń politsiia departamenti men Qarjy ministrligi tartyldy.
Qarjy ministrligi atalǵan sanattaǵy ister boiynsha sottarǵa memlekettik qazynanyń ókili retinde qatysady jáne qylmystyq qýdalaýǵa eshqandai qatysy joq.
Sonymen birge ministrlikte sot aqtaǵan adamnyń qylmystyq protsesti júrgizetin organnyń zańsyz áreketteri nátijesinde keltirilgen ziian úshin ótemaqy alýǵa quqyly ekenin aitty (QR QPK 38 b. 2 ból. 1 t.)
Azamatqa zańsyz qýdalaý, qamaýda ustaýdy zańsyz qoldaný, úi qamaǵynda ustaý, aldyn-alý sharasy retinde ketpeý týraly sheshim qabyldaý nátijesinde azamatqa keltirilgen ziiandy memleket óteidi (QR AIJK-niń 923-babynyń 1-tarmaǵy).
Tólem Qarjy ministrligi basqaratyn 010 «Qazaqstan Respýblikasy Úkimetiniń rezervi» biýdjettik baǵdarlamasyna sáikes júzege asyrylady.
Vedomstvoda bul azamattyq isti qaraý áli aiaqtalmaǵanyn atap ótti.
Eske salaiyq, 2019 jylǵy 14 naýryzda J.B.Diýsekenova Aqtóbe oblysy IID-niń ishki ister basqarmasy aǵa tergeýshisiniń qaýlysymen qylmystyq is boiynsha kúdikti dep tanylyp, onyń áreketteri Qylmystyq kodekstiń 190-baby, 3-bóligi, 2-tarmaǵy boiynsha kvalifikatsiialanǵan.
Keiin tergelip jatqan qylmystyq is Aqtóbe oblysy boiynsha sybailas jemqorlyqqa qarsy qyzmetke ótkizilip, tergeý nátijeleri boiynsha qylmystyq is sotqa jiberildi.
Aqtóbe qalasynyń №2 sotynyń 2020 jylǵy 19 aqpandaǵy úkimimen Diýsekenova J.B. is-áreketterinde qylmystyq quqyq buzýshylyq bolmaǵany úshin aqtaldy.
Aqtóbe qalasy №2 sotynyń 2020 jylǵy 24 shildedegi qaýlysymen J.B.Diýsekenovanyń múliktik ziiandy óteý bóliginde talaptary qanaǵattandyryldy jáne onyń paidasyna memleket qazynasynan 4 072 073 teńge óndirildi.
