Ádep jónindegi keńes jer telimin jalǵa berý, jerdi memleket menshigine qaitarý komissiiasynyń jumysyn tekserdi. Óz inisine jer telimin bergen Yrǵyz aýdandyq jer qatynastary bóliminiń basshysy Aralbai Eralin men Yrǵyz aýyldyq okrýginiń ákimi Altynbek Sarin qyzmetinen aiyrylýy múmkin, dep habarlaidy "Ult aqparat".
Memlekettik qyzmet isteri agenttigi oblystyq departamentiniń Ádep keńesi Yrǵyz aýdandyq prokýratýrasynyń usynysyn qadaǵalaýdy kúsheitti.
Keńes Yrǵyz aýdandyq jer qatynastary bóliminiń basshysy Aralbai Eralin, Yrǵyz aýdandyq kásipkerlik jáne aýyl sharýashylyǵy bóliminiń basshysy Arman Nýrekeshov, Yrǵyz aýdandyq qurylys, sáýlet, turǵyn úi-kommýnaldyq sharýashylyǵy, jolaýshylar kóligi jáne avtomobil joldary bóliminiń basshysy Igor Turtaev jáne Yrǵyz aýyldyq okrýginiń ákimi Altynbek Saringe qatysty tártiptik is qozǵap, qyzmettik tergeý júrgizdi.
«2020 jyldyń 24-26 tamyz aralyǵynda sharýa nemese fermer qojalyǵyna jerdi ýaqytsha jalǵa berý úshin jer komissiiasynyń otyrysy ótti. Sol kezde konvertterdi ashý rásimi aýdio, beinejazbaǵa túsirilmegen. Sonymen birge jer komissiiasynyń otyrysyn ótkizý hattamasy aýdio-beine jazbaǵa sáikes toltyrylmaǵan. Iaǵni, beine jazbaǵa sáikes 6 lot boiynsha daýys berý esebi tepe-teń bolsa, hattamaǵa sáikes daýys berý esebi negizsiz joǵarylatylyp, oǵan barlyq komissiia múshesi qol qoiǵan. Al Yrǵyz aýdandyq jer qatynastary bóliminiń basshysy A.Eralin «Nurǵali» sharýa qojalyǵyna 2020 jyldyń 6 qazanynan bastap 2021 jyldyń 6 naýryzyna deiin Nura aýyldyq okrýginiń aýmaǵynan qys mezgilinde maýsymdyq shóp shabý úshin 15 637 ga jer ýchaskesin bergen», - dedi QR Memlekettik qyzmet isteri agenttiginiń Aqtóbe oblysy boiynsha departamentiniń memlekettik qyzmet salasyn baqylaý basqarmasynyń bas mamany Qairat Akiev.
Sonymen qatar Yrǵyz aýdany, Amankól aýyldyq okrýginiń aýmaǵynda ornalasqan 1434 ga jer ýchaskesin alýǵa E.Eralin men T. Jubanyshev ótinish birdirgen.
Jer komissiiasy tóraǵasynyń orynbasary A.Eralin konkýrsqa qatysqan óz inisi Erbol Eralinge basymdyq berip, biraýyzdan ony jeńimpaz dep tanydy.
«Memlekettik qyzmette júrgenime 11 jyl boldy. Qatelik ketti, men ony moiyndaimyn. Negizi komissiia otyrysy qaita-qaita keiingi shegerildi. Adam sany da jetpedi. Qazir inim jer alyp, mal baǵyp otyr», - dedi Yrǵyz aýdandyq jer qatynastary bóliminiń basshysy Aralbai Eralin.
Ádep keńesinde A.Nýrekeshov, I. Turtaevqa qatysty qyzmetke tolyq sáikes emes túrindegi tártiptik jaza qoldaný usynylsa, al A.Eralin men A.Sarindi jumystan shyǵarý túrindegi tártiptik jaza qoldaný týraly sheshim qabyldandy.
