Reseilik maman Vladimir Maminov «Aqtóbe» klýbynyń bas bapkeri retinde jumysqa kiristi, dep habarlaidy "Ult aqparat".
«Aqtóbe» fýtbol klýby málimdegendei, V.Maminovpen kelisimshartqa qol qoiylǵan.
Komanda quramyn jasaqtaýdy bastaǵan jańa bapker «Aqtóbemen» birge jýyrda Túrkiiada ótetin birinshi oqý-jattyǵý jiynyna attanatyn bolady.
V.Maminov fýtbolshy retinde máskeýlik «Lokomotiv» quramynda 1992-2008 jyldary dop tepti.
Ózbekstan quramasynda da oinaǵan 45 jastaǵy V.Maminov bapkerlik mansabyn «Lokomotivte» bastap, bas bapkerdiń kómekshisi boldy. Ýaqytsha bas bapkerlik mindetin atqarǵan ol keiin Qazannyń «Rýbin» klýbyna aýysty. 2014 jyldan bastap «Himki», «Soliaris» (Máskeý), «Tiýmen» klýbtaryn bas bapker retinde jattyqtyrdy.
Kezinde bes márte el chempiony, úsh retten kúmis jáne qola júldeger atanǵan «Aqtóbe» ótken maýsymda premer-ligadan túsip qalǵan bolatyn. Biyl V.Maminovtyń jetekshiligimen oǵan qaita oralýdy maqsat etetini sózsiz.
Eske sala keteiik, budan buryn «Barselonanyń» bas bapkeri aýysqanyn, «Astanaǵa» Mihal Bilektiń kelgenin jazǵan bolatynbyz.
