Aqtóbelik oqýshy Dias Sáken «Aqtóbe» - «Astana» matchyna bilet tappai, jarty saǵat boiy stadion syrtynda syǵalap otyrdy. Ol ózine abonement syilaýdy tapsyrǵan oblys ákimine alǵysyn jetkizdi, dep habarlaidy QazAqparat agenttigi.
Bozbala bir-aq sátte elimizge tanyldy. Ol keshe «Aqtóbe» - «Astana» matchyn tamashalaýǵa barǵanymen, stadionǵa kire almai qalǵan.
Sóitip oiyndy syǵalap qarap, shyn jankúier ekenin bildirdi.
«Matchqa biletti elektrondy túrde satyp alǵym keldi. Biraq bolmady. Keiin kassadan alǵym keldi. Onda da bolmady. Oiyn kúni stadiondy bir ainalyp shyqtym. Negizi oiyndy tamashalaýǵa atammen birge bardym. Keiin úige qaitamyz dep turǵanda atamnyń kóligi kóp mashinanyń ortasynda qalyp qoiǵanyn kórdik. Ýaqytty tekke ótkizbes úshin men stadionǵa qaita bardym. Syrtynan qaraiyn dep sheshtim de syǵalap otyrdym. Qonaqtar otyratyn orynnyń artynda syǵalaityn jer bar. Sonda alań jartylai kórindi. Otyrǵanyma 30 minýttai boldy. Meniń túrimdi kórgen Aidyn Qojahmetov ishki kirgizip aldy. Tipti «biz uttyq» dep qushaqtap aldy. Óte áserli oiyn dep aityp edim. Sóitip matchtyń ortasynan bastap oiyndy stadionda tamashaladym», - dedi aqtóbelik jankúier.
Dias qazir jazǵy demalysta júr. Bos ýaqytynda fýtbol, voleibol oinaidy.
«Fýtboldy kompiýterde oinap qyzyqtym. Keiin arnaiy úiirmege qatystym. Ózimniń armanym – fýtbolshy bolý. Keide kásipker de bolǵym keledi. Ózim biyl №56 orta mekteptiń 8-synybyn bitirdim», - deidi ol.
Dias Sáken maýsymdyq abonement alǵanyna qýanyshty. Ol erekshe syi jasaǵan oblys ákimi Ońdasyn Orazalinge alǵysyn bildirdi.
