4 maýsym kúni Aqtaý turǵyny «Aqtóbe-Aqtaý» baǵytymen kele jatqan poiyzda bosanyp qaldy. Ony temirjol quramynyń bastyǵy men akýsher bosandyrǵan, dep habarlaidy "Ult aqparat" Lada-ǵa silteme jasap.
Júktiliktiń segizinshi aiynda bolǵan Aqtóbe oblysynyń týmasy Aqtaýǵa, óz úiine kele jatqan. Aqtóbede anasynyń úiinde qonaqta bolǵan.
«4 maýsym kúni tańǵy saǵat 5-te maǵan jolserikter kelip, jetinshi vagondaǵy áieldiń tolǵaǵy bastalǵanyn aitty. Áriptesterimmen birge basqa jolaýshylardan poiyzda dáriger bar ma dep surastyra bastadyq. Besinshi vagonnan aqtóbelik akýsher dáriger Svetlana Núrpeiisova tabyldy. Bosanyp jatqan áiel qyzmettik kýpege aýystyrylyp, oǵan kómek kórsetile bastady. Saǵat 11:10-da ol dúniege ul bala ákeldi. Barlyq stansalarda jas anaǵa jedel járdem dárigerleri meditsinalyq kómek kórsetti. Boijetken stansalardyń birinde qalǵysy kelmedi», - dep baiandady Aqtóbe-Aqtaý poiyzynyń bastyǵy Botagóz Qidanova.
Bul Botagóz Qidanovanyń poiyzda áiel bosandyrýdyń birinshi oqiǵasy emes ekeni anyqtaldy. Bul oqiǵaǵa deiin ol úsh qyz balanyń dúniege kelýine kómektesken.
«Náresteniń esimin Dinmuhamed dep qoiǵan. Anasy ekeýiniń jaǵdaiy jaqsy», - dep atap ótti B.Qidanova.
