Mamyrdyń 25-i kúni Aqtaý qalasyndaǵy Nazarbaev Ziiatkerlik mektebiniń oqýshylaryna mektep tarihynda tuńǵysh ret onlain-sońǵy qońyraý soǵyldy. Bilim ordasynyń oqýshylary 2019-2020 oqý jyly men úiden qoshtasty.
Saltanatty shara Microsoft Teams platformasynda uiymdastyryldy. Eki kezeńde ótkizilgen jiynǵa oqýshylar, ustazdar jáne ata-analar onlain qatysty. Alǵashqy jiyn biyl mektep bitirip jatqan 162 túlekke arnap uiymdastyrylsa, ekinshi kezeńde tómengi synyp oqýshylary óz shańyraqtarynda mektep direktorynyń orynbasarlary men shańyraq kýratorlarymen onlain-kezdesý ótkizip, oqý jylyn qorytyndylady. Jiyn barysynda mektep direktory Ermek Paizov biyl mekteppen qoshtasqan túlekterdi quttyqtap, «Nazarbaev Ziiatkerlik mektepteri» DBBU basqarma tóraiymy Kúlásh Shamshidinovanyń quttyqtaý hatyn oqyp berdi.
- Qurmetti túlekter! Sizderdi búgingi mektep bitirýlerińizben shyn júrekten quttyqtaimyn! Shekara degen túsinikke baǵynbaǵan búkil álemdik indet Koronavirýs pandemiiasymen qúresý maqsatynda elimizde tótenshe jaǵdaidyń oryn alýyna bailanysty búgin sizdermen onlain-kezdesip otyrmyz. Sizderdi saǵynsaq ta, elimizdiń jas urpaǵynyń densaýlyǵy bárinen mańyzdy, - dedi Ermek Serikuly.
Keiin mekteptiń qamqorshylar keńesiniń tóraǵasy Bekmurat Júsipov te túlekterdi oqý jylynyń aiaqtalýymen quttyqtap, túlekterge úlken ómirge sátti qadam tiledi. Saltanatty jiynnan soń, oqýshylar elimizdiń tanymal ánshisi Dimash Qudaibergenniń NZM túlekterin quttyqtaý videosyn tamashalady.
Aita ketý kerek, biyl ziiatkerlik mektepti 162 túlek aiaqtap otyr. Bul oqý ornynyń tarihyndaǵy eń kóp túlek. Oqý jylynyń aiaǵynda 9 altyn belgi, 9 úzdik attestatqa úmitker óz bilimderin dáleldep, úzdik nátije kórsetti. Sonymen qatar, biylǵy oqý jylynda túlekterdiń IELTS jáne SAT emtihandaryndaǵy kórsetkishi de joǵary ekendigi baiqalyp otyr. Máselen, aǵylshyn tilin meńgerý deńgeiin anyqtaityn IELTS emtihanynan Daiana Býlatbekova, Áigerim Shoraeva, Injý Kósherbaeva, Malika Nurmuhamet jáne Amina Abil 8,0 ball jinady.
Aqtaýdaǵy Nazarbaev Ziiatkerlik mektebiniń biylǵy jylǵy túlekteri AQSh, Kanada, Niderland, Ońtústik Koreia, Gonkong, Vengriia, Singapýr, Túrkiia, Resei elderindegi beldi ýniversitetteriniń stýdenti atanýǵa shaqyrtý aldy. 23 túlek Nazarbaev Ýniversitetiniń (Foundation – 17, Direct - 6), 12 – túlek Vengriia ýniversitetterine 100 % bilim grantyn alsa, 40-tan asa túlegimiz Kanada, AQSh, Týrkiia, Gonkong jáne Vengriia ýniversitetterinen jaýap kútýde.
