Aqtaýdaǵy bir top jigit tóbelesip, onda jas jigit pyshaqtan jaralanǵan. Bul týraly lada.kz saity jazdy.
Oqiǵa 4 tamyzǵa qaraǵan túnde, 4-shaǵyn aýdandaǵy №3 úidiń aldynda bolǵan. Mańǵystaý oblysynyń Politsiia departamenti jáne Densaýlyq saqtaý basqarmasy oqiǵa jaily tolyqqandy aqparat berdi.
4 tamyzǵa qaraǵan túnde Aqtaý politsiia basqarmasynyń kezekshi bólimine bir top adamnyń tóbelesi týraly habar kelip túsken. Oqiǵa ornyna politsiia jasaǵynyń 10 kóligi attanǵan.
Eki jas jigit sózge kelip qalǵan. Saldarynan onyń biri qarsylasynyń keýde tusyna pyshaq suǵyp alǵan.
Kúdikti sol kúni anyqtalyp, ustaldy.
Qazir QR Qylmystyq kodeksiniń 106-baby («Densaýlyqqa qasaqana aýyr ziian keltirý») 1-bóligi boiynsha sotqa deiingi tergep-tekserý júrip jatyr. Kúdikti aiypty dep tanylǵan jaǵdaida úsh jyldan jeti jylǵa deiingi merzimge bas bostandyǵynan aiyrylýy nemese sol merzimge bas bostandyǵy shektelýi múmkin.
Pyshaqtan jaralanǵan jas jigitti jedel járdem Mańǵystaý oblystyq aýrýhanasyna jetkizgen. Dárigerler ota jasap, jigitti ajaldan arashalap qaldy.
