Mańǵystaý oblysy Bilim basqarmasy Aqtaý qalasynda mektep oqýshylarynyń arasyndaǵy tóbelestiń mán-jaiyn aitty, dep habarlaidy QazAqparat.
Aqtaý qalasyndaǵy №20 mektepte 9 «á» synyp oqýshysy men 9 «v» synyp oqýshysy arasyndaǵy tóbeles bolǵan.
«Biyl 11 qarashada saǵat 10:20 shamasynda Aqtaý qalasy 28-shi shaǵyn aýdanda ornalasqan M.Áýezov atyndaǵy №20 jalpy bilim berý orta mektebiniń ekinshi qabatynda ornalasqan ájethananyń ishinde kámeletke tolmaǵan jasóspirimder sózge kelip qalyp, bir-birine tóbeles ústinde dene jaraqatyn salǵan», - delingen basqarma málimetinde.
Oqiǵa oryn alǵan kúni mekteptegi 2 qabattyń kezekshi muǵalimi ájethanadaǵy dybystardy estip barǵanda, esinen tanyp qulap jatqan oqýshyny kórgen.
«Mektep ákimshiligi oqýshyǵa alǵashqy kómek kórsetti. Oqiǵa mektep inspektory men oqýshylardyń ata-analaryna eskertildi. Mektepke jedel járdem shaqyrtyldy», - delingen habarlamada.
Keiinnen, balanyń basyna aýyr soqqy jasalǵany jáne jaǵy synǵany anyqtaldy.
«Sol kúngi kezekshi muǵalimnen, synyp jetekshilerinen atalǵan oqiǵa boiynsha túsinikteme alyndy. Tekserý jumystary júrgizilip jatyr. Atalǵan oqiǵa boiynsha № 20 mektep direktorynyń tárbie isi jónindegi orynbasaryna tártiptik shara retinde «sógis» jariialandy. Oqýshyǵa qatysty másele Aqtaý qalasy ákimdigi janyndaǵy kámeletke tolmaǵandardyń isi jáne olardyń quqyǵyn qorǵaý komissiiasynda qaralady. Komissiianyń ýaqyty men kúni qosymsha taraptarǵa habarlanady», - delingen basqara málimetinde.
