Aqtaýlyq turǵyn "balam álimjettiktiń qurbany boldy" dep shaǵymdanyp otyr. Aitýynsha, ulyn joǵary synypta oqityn bala elektr shokermen uryp, soqqyǵa jyqqan. Saldarynan 7-synyp oqýshysynyń miy shaiqalyp, aýrýhanada jatyp shyqqan. Jábirlenýshiniń anasy balasyn muǵalimderdiń de kemsitkenin bilip, jaǵamdy ustadym dep otyr. Politsiia qazir "buzaqylyq" baby boiynsha is qozǵap, tergeýdi bastady, dep habarlaidy "Ult aqparat" 31-arnanyń “Informbiýro” baǵdarlamasyna silteme jasap.
Oqýshynyń anasy Ásem Munatova oqiǵanyń 16 sáýirde túski ýaqytta bolǵanyn aitady. 11-synyp oqýshysy ulyn elektr shokermen uryp, judyryq jumsaǵan. Eń soraqysy, álimjettik jasaǵan bozbala bokstan sport sheberine úmitker, deidi shyr-pyr bolǵan ana.
"Elektr shokermen birneshe ret aiaǵynan urǵannan keiin Nurbek turyp, jańaǵy balany iteredi. Itergennen keiin meniń balamdy jaǵynan uryp qulatady. Basy oryndyqqa tiip, birneshe minýt esin joǵaltty", – dep túsindirdi jábirlenýshiniń anasy Ásem Munatova.
Anasy bul jaǵdaidy jumystan kelgen kezde bir-aq bilgenin aitady. Jetkinshek úiine bara sala kóńil-kúii bolmai, jarty saǵat jýynatyn bólmede otyrypty. Taiaq jegen bala qaita-qaita loqsyp, basy aýyrǵan soń ony aýrýhanaǵa jatqyzǵan eken. Politsiiaǵa da habar bergen. Alaida bolǵan jaitty áleýmettik jelige jariialamaiynsha politsiia is qozǵamapty.
"Uryp bolǵannan keiin mektepte búkil balany jinap, "myna Nurbekpen búginnen bastap eshkim qol berip amandaspańdar, Nurbek – toqyldaq" dep býlling jasaidy. Bizge basqa oqýshylardan habar kele bastady. Dene shynyqtyrý pánine sabaq beretin aǵaiy men tarih páninen beretin apaiy meniń balama býlling jasaǵan. Basqa muǵalimniń sabaǵy ústinde synypqa kelip, “Qýatov Nurbek – jaman oqýshy, ol – bizdiń mekteptiń "shirigen kartoshkasy" dep meniń balamdy jamandap ketken", – deidi shyr-pyr bolǵan ana.
Qazir politsiia "Buzaqylyq" baby boiynsha tergeý júrgizip jatyr. Al mektepte bolǵan býllingten ustazdar beihabar deidi jábirlenýshiniń anasy. Bilim oshaǵynyń basshylyǵy joǵary synyp oqýshysynyń buǵan deiin toptyq tóbeleske qatysyp, erekshe baqylaýda bolǵanyn jasyrmaidy.
"Mektebimiz ishinen, syrtynan 78 kameramen jasaqtalǵan. Endi bul kezde balalar tarap jatqandyqtan oqiǵa baiqalmai qalǵan. Ol jerde tóbeles bolǵan joq, ekeýi sóilesip otyrady da, bir kezde kelispei atyp turyp, bir-birin iterip qalyp, bir qol jumsaý bolǵan. Ol endi sportshy, boksshy, kóptegen sharaǵa qatysyp júr. Minezinde kishkene tentektik bar. Ózin kei kezde ustai almai qalatyny bar", – deidi №23 mektep direktorynyń tárbie isi jónindegi orynbasary Elmira Jamilova.
Aita keteiik, buǵan deiin Aqtóbede sport mektebiniń segizinshi synyp oqýshysyn ózinen bir-eki jas úlken uldar uryp óltirgen. Muny kýágerler de, saraptama da rastady. Qazir kúdikke ilingen balalar qamaýda otyr. Ulynan aiyrylǵan ata-ana jaýyzdyqqa barǵan jasóspirimderdi de, alǵashynda qylmysty barynsha jasyrǵan bilim oshaǵynyń basshylaryn da qatań jazalaýdy suraidy.
