Aqtaýda 7 qarasha kúni keshke jarylys bolǵan "Sherqala" kesheninde ornalasqan "Aianat" kafesiniń qojaiyny oqiǵa kezinde mekemede eshkim bolmaǵanyn aitty. Kásipkerdiń pikirin qala ákimdigi Instagram paraqshasynda jariialady, - dep habarlaidy Tengrinews.kz tilshisi.
Er adamnyń aitýynsha, onyń mekemesi printsip boiynsha ýaqytynda jabylady.
"Men kafemdi saǵat 19.30 shamasynda jaýyp tastadym. Sondyqtan kafede jumysshylar da, qonaqtar da bolǵan joq. Kórshilerdi bilmeimin, men olarǵa jaýapty emespin", - dedi Abai Ámireev.
Jergilikti biliktiń málimetinshe, eki qabatty "Sherqala" kesheniniń ishinde jumys kiimderin satatyn dúken, avtobólshekter, meiramhana, monsha, tehnikalyq qyzmet kórsetý beketi, qoima siiaqty nysandar bar.
Aqtaý ákimi Nurdáýlet Qilybai da jarylys jaǵdaiyna qatysty pikir bildirdi. Ol saǵat 00:00-ge deiin eshkim meditsinalyq kómekke júginbegenin aitty. "Kinologtar men tótenshe jaǵdai qyzmetkerleri jumys istep jatyr", - dedi ol.
Tótenshe oqiǵa ornyna Mańǵystaý oblysynyń ákimi Nurlan Noǵaev keldi. Quqyq qorǵaý jáne memlekettik organdardyń basshylarymen jedel keńes ótkizdi.
Al, oblystyń Tótenshe jaǵdailar ministrliginiń sońǵy málimeti boiynsha, jarylys saldarynan 11 kólik zaqymdanǵan. Jol politseileri evakýator arqyly úsh kólikti evakýatsiialady. Qalǵan segiz kóliktiń ielerin anyqtaý jumystary júrgizilip jatyr.
Sondai-aq jarylys "Aianat" kafesinde emes, jaqyn jerdegi samsa men palaý satatyn dúkende bolǵany belgili boldy.
Mańǵystaý oblysy Tótenshe jaǵdailar departamenti bastyǵynyń orynbasary Bekbolat Ábdiqadyrov jarylys gaz-aýa qospasynan bolýy múmkin ekenin aitty.
