Aqtaýlyq sanitar dárigerler Kaspii sýy men jaǵajaidaǵy qumnan synama alyp, adam densaýlyǵyna qaýipti qozdyrǵyshtardy anyqtaǵan, dep habarlaidy QazAqparat tilshisi.
Zertteý qorytyndysy boiynsha, bul «Klostridiia perfringens» bakteriiasy ekendigi anyqtaldy. Onyń asqazanǵa infektsiia túsirip, kez-kelgen aýrýdy asqyndyrý qaýpi joǵary. Sondyqtan mamandar turǵyndar men qala qonaqtaryn shomylý maýsymy kezinde saq bolýǵa shaqyrady.
Kúnniń ystyǵynan pana izdegender Kaspii teńiziniń jaǵalaýyna aǵylady. Shomylý maýsymy bastalǵaly sanitar dárigerler teńiz sýy men qumnan eki ret synama alyp, qaýipti qozdyrǵyshtardy anyqtaǵan.
Mamandardyń málimdeýinshe, adam densaýlyǵyna ziian keltiretin bakteriia ásirese jańbyrly kúnderi kóp taralady. Mamandar qumdy qopsytyp-qoparyp, jaǵajailardy jii tazalaý kerektigin eskertedi. Sebebi osyndai kezde bakteriia kúnniń astynda óledi eken.
Dabyl qaqqan mamandar atalǵan jaǵdaiǵa bailanysty qala ákimine hat jazyp, usynystaryn joldaǵan.
«Bul bakteriia topyraqta uzaq saqtalyp, adamnyń aǵzasyna infektsiia túsiredi. Ashyq jaraqaty bar adamdarda gazdy gangrena paida bolýy múmkin. Adamnyń terisin jaraqattaidy. Asqynsa aiaq, ne qoldy kesý kerek bolady. Sondyqtan turǵyndarǵa, qala qonaqtarynsha ásirese balalarǵa barynsha saqtyq sharalaryn saqtaýǵa shaqyramyz. Óitkeni atalmysh bakteriia immýniteti álsiz adamdarǵa qaýipti», - deidi Aqtaý qalalyq Qoǵamdyq densaýlyq saqtaý basqarmasy basshysynyń m.a. Ásima Jumabaiqyzy.
Búgin ákimdikte ótken jiynda osy másele kóterildi. Endi Aqtaý jaǵajailaryndaǵy qumdardy qopsytý týraly tapsyrma berildi.
«Tótenshe jaǵdailar jónindegi qalalyq shtab bastyǵy teńizde baqylaý beketteriniń ornatyla bastaǵanyn málimdedi. Barlyǵyn tez uiymdastyrý kerek. Bul protseske jaǵalaýda kásibi bar kásipkerler de shaqyrylady», - deidi ekolog Kirill Osin.
