«Aqtaý qalalyq sáýlet jáne qala qurylysy bólimi» memlekettik mekemesiniń basshysy E.Sárkenovke 408 580 teńge mólsherinde aiyppul salynǵan. Aita ketý kerek, atalmysh somany memleket paidasyna sheneýnik óz qaltasynan óndirgen.
QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Mańǵystaý oblysy boiynsha departamentiniń habarlaýynsha, ishinara jáne jospardan tys tekserýlerdiń nátijesinde, ústimizdegi jyldyń 5 aiynda memlekettik kórsetiletin qyzmetter salasynda ruqsat berýdiń tártibin, merzimin buzý jáne negizsiz bas tartý derekteri Aqtaý jáne Jańaózen qalalary, Munaily aýdanynda oryn alyp, jalpy somasy 541 125 tenge kóleminde aiyppul salynǵan.
Al eń iri kólemdegi aiyppul Aqtaý qalasynyń ákimdigine qatysty sheneýnikten óndirilip otyr. Atap aitqanda, barlyǵy 16 ákimshilik hattamanyń 10 «Aqtaý qalalyq sáýlet jáne qala qurylysy» memlekettik mekemesiniń basshysy E.Sárkenovke qatysty toltyrylǵan.
«Sheneýnikke qatysty is Qazaqstan Respýblikasy ákimshilik quqyqbuzýshylyq týraly Kodeksiniń 465 babynyń 2 baby, iaǵni ruqsat berýden bas tartý jáne osy bólimniń 3 baby, iaǵni ákimshilik jaza qoldanylǵannan keiin bir jyl ishinde qaitalap jasaǵan áreketi úshin jaza qoldanyldy», - dedi QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Mańǵystaý oblysy boiynsha departamentiniń basshysy, Ádep jónindegi keńes tóraiymy Nurgúl Jannazarova.
Osylaisha bir jyldyń ishinde eki ret zań buzýshylyqqa jol bergen ákimdik qyzmetkeri ákimshilik jazamen qutyldy.
Aita ketý kerek, ótken jyldyń osy merzim aralyǵynda zańǵa qaishy áreketterge jol bergen sheneýnikterge qatysty ýákiletti organmen 6 ákimshilik is qozǵalsa, biyl bul kórsetkish 16 derekke artyq bolyp otyr.
