Áleýmettik jelilerde Aqtaýda qyz alyp qashqandardyń videosy tarap jatyr. Video ázil bolyp shyqty, - dep habarlaidy Tengrinews.kz.
Bastapqyda áleýmettik jelilerde videonyń qysqasha bóligi ǵana tarady. Onda birneshe er adam qyzdy kólikpen úige alyp keledi. Qyz jylap, avtomobilden shyǵýdan bas tartady. Artynda kóńildi mýzyka oinap turady. Jaǵdai qazaqtyń "Qyz alyp qashý" dástúrine uqsaidy.
Alaida keiinirek videonyń tolyq nusqasy jariialandy. Ol prank bolyp shyqty.
Mańǵystaý oblysy politsiia departamentiniń baspasóz qyzmetindegiler 2021 jyldyń 8 shildesinde Aqtaýda jastar prank uiymdastyrǵanyn habarlady.
"Prank videosynyń úzindisi áleýmettik jelilerde keńinen tarap, halyq arasynda shý shyǵardy. Keiin tolyq videodan bul prank ekeni belgili boldy. Prank músheleriniń barlyǵy derlik politsiiaǵa jetkizilip, túsiniktemeler alyndy. Politsiia qyzmetkerleri olarmen túsindirý jumystaryn júrgizdi. Sonymen qatar, qyz ben onyń anasy shaǵym jazbady. Qyz olarmen burynnan dos ekenin aitty", - dep habarlady quqyq qorǵaý organdary ókili.
Departamenttegiler prank qatysýshylary qazaqstandyqtardan keshirim suraǵan kadrlardy da jariialady.
Sonymen qatar, politseiler júrgizýshi men jolaýshylar qaýipsizdik beldigin taqpaǵanyn atap ótti. Olarǵa ákimshilik hattama jasaldy.
"Sondai-aq, tekserý kezinde júrgizýshi saqtandyrý polisinde tirkelmegeni anyqtaldy. Júrgizýshige qatysty 593-baptyń 2-bóligi "Qaýipsizdik beldikterin paidalaný qaǵidalaryn saqtamaý" jáne ÁQBtK-niń 230-baby 2-bóligi "Qazaqstan Respýblikasynyń mindetti saqtandyrý týraly zańnamasyn buzý" boiynsha ákimshilik hattama toltyryldy. Jolaýshylarǵa qatysty ÁQBtK-niń 615-baby "Jaiaý júrginshilerdiń jáne jol júrisine ózge de qatysýshylardyń qozǵalys erejelerin buzýy" boiynsha hattama jasaldy", - dedi vedomstvo ókilderi.
