Aqtaý qalasy 4 sh/a 57 úidiń turǵyny kórshisiniń kesirinen eki qyzymen aýrýhanaǵa túsip qaldy,dep habarlaidy "Ult aqparat".
Jedel járdem brigadasy 42 jastaǵy áielge jáne 15 pen 10 jasar eki qyzyna himiialyq zattarmen ýlanǵan degen diagnoz qoiǵan. Ózderin jaisyz sezingenderi eskerilip, shuǵyl túrde anasyn oblystyq aýrýhanaǵa, al qyzdardy kópbeiindi balalar aýrýhanasyna jetkizgen. Áielge tiisti meditsinalyq kómek kórsetilgen soń, úiine jiberilgen. Alaida eki qyzyn aýrýhanaǵa jatqyzýǵa týra keldi.
«Kepildendirilgen tegin meditsinalyq kómek aiasynda qyzdarǵa barlyq em-dom sharalary jasaldy. Jaǵdailary turaqty. Ómirlerine tónip turǵan qaýip joq. Eki-úsh kúnde úiine jiberiledi dep kútilýde», - dep habarlady oblystyq densaýlyq saqtaý basqarmasynyń baspasóz qyzmeti.
Zardap shegýshi Iýliia Moldovannyń aitýynsha, bul jaǵdai osydan eki kún buryn bolǵan.
«Kelgen bette jaǵymsyz iistiń baryn sezdim, úide úlken qyzym bar edi, sodan surasam bul iistiń paida bolǵanyna biraz bolǵanyn aitty. Tótenshe jaǵdailar jáne politsiia departamentterine habarlastym. Olar kele salysymen úidiń iesin taýyp, shaqyrtqan bolatyn. Úiine kirip qarasaq rasynda da qandalany ýlaimyn dep esigin kilttep, ózderi basqa mekenjaiǵa ketip qalǵan. Nege kórshilerdi eskertpedińiz dese, ne úshin eskertýim kerek dep jeńistik bermedi. Alǵashynda aýany tazartý úshin balkondaǵy terezeni ashyp bir táýlikke qaldyrǵan edi. Al keshe úige kelsem taǵy da terezeni jaýyp ketken, qaitadan jaǵymsyz iisti sezindik. Qusqymyz kelip, basymyz ainaldy, qyzdarymnyń jaǵdaiy birden nasharlai túskenin baiqadym, úide otyrý múmkin bolmaǵan soń jedel járdem stantsiiasyna habarlastym. Osylai balalar aýrýhanasynan bir-aq shyqtyq. Eki kún boldy, qajetti meditsinalyq kómegin alyp jatyr. Dárigerlerge alǵysym sheksiz, kúndiz-túni qasymyzda. Endi kórshimniń ústinen shaǵym túsiremin, tiisti jazasyn alsyn», - deidi ol.
Aita ketý kerek, jyl basynan beri qandalany ýlaý kezinde kórshi páter turǵyndarynyń himiialyq zattan ýlaný boiynsha bul ekinshi oqiǵa. Al ótken jyly osyndai derek boiynsha jedel járdem qyzmetine turǵyndar 13 ret telefon shalǵan. Ókinishke orai, munyń saldarynan kóz jumǵandar boldy, aralarynda kámelettik jasqa tolmaǵan jáne eresekter de bar.
