Foto: Ashyq derekkózden
Aqtaýda júrgizýshiler taǵy da avtogaz quiý beketterinde gaz úshin saǵattap kezekte turǵandaryn aityp shaǵymdandy, dep habarlaidy Ult.kz Lada.kz basylymyna silteme jasap.
Jelide taraǵan videolardan birneshe shaqyrymǵa sozylǵan kezekti kórýge bolady. Kezek kútken júrgizýshilerdiń biri tańǵy saǵat 07:30 janarmai beketi ashylmai turyp kelse de, kezek bolǵanyn, ýaqyt óte kezektegi kólikterdiń kóbeiip ketkenin aitady.
“Bul joly sheneýnikter qandai syltaý aitar eken? Qazir týrister de kóp emes, bar gazymyzdy taýysyp tastaityndai, maýsym áldeqashan bitti”, – dep ashýlandy er adam.
Mańǵystaý oblysynyń kásipkerlik jáne saýda basqarmasy jaǵdaiǵa pikir bildirdi. Basqarmanyń málimetinshe, óńir eldegi suiytylǵan gazdy eń kóp tutynatyn aimaqtardyń bir. Ai saiynǵy tutyný kólemi óńirde 18 000 tonnaǵa jetedi.
Gazdyń negizgi bóligi Mańǵystaý oblysyndaǵy Qazaq gaz óńdeý zaýytynan jetkizilip, al jetispeitin kólemi Atyraýdaǵy zaýyttan alynady eken. Qazan aiynda Atyraý zaýytynda josparly jóndeý jumystaryna bailanysty qajetti 3 658 tonna gaz Aqtóbe zaýytynan ákelinetin kórinedi.
“Buǵan deiin Atyraý zaýytynan ónim avtokólikpen jetkizilse, Aqtóbe zaýytynan temirjol arqyly ákelinedi. Sol sebepti ónimdi óńirge jetkizý ýaqyty biraz uzardy”, – delingen basqarmanyń habarlamasynda.
Sol sebepti qazan aiynda suiytylǵan gazdyń táýliktik jetkizilý kólemi tómendep, keibir avtogaz quiý beketterinde kólik kezekteri jalǵasa bermek.
Atyraý zaýytyndaǵy jóndeý jumystary qazan aiynyń sońynda aiaqtalatyny habarlandy. 1 qarashadan bastap oblysqa suiytylǵan gaz jetkizý tolyqtai burynǵy qalypty rejimine oralady.
