© Photo: Azamat Sársenbaevtyń áleýmettik jelidegi paraqshasynan
Qarakól ózenine jiberiletin sýdy zertteý kezinde ziiandy zattardyń shamadan tys mólsheri anyqtaldy. Sonyń negizinde "Rixos Aktau" qonaq úiine qatysty tekseris bastaldy, dep habarlaidy Sputnik Qazaqstan saity Lada.kz portalyna silteme jasap.
Sońǵy málimetke sáikes, Qarakóldiń jaǵasynda 826 aqqýdyń óleksesi tabyldy. Barlyǵyn jaǵyp jibergen. Bas kezinde mamandar júzdegen aqqýdyń qus tumaýynan qyrylǵanyn málimdedi.
Al áleýmettik jelide "Rixos Aktau" qonaq úiinen kólge túsetin qubyrdyń videosy tarady. Halyq kólge ziiandy qaldyqtardyń tógilip jatqanyn jarysa jazdy. Sonyń saldarynan aqqýlar qyrylyp jatyr degen boljam da jasaldy.
Ekologiia jáne tabiǵi resýrstar ministrligi "Rixos Aktau" qonaq úiine qatysty jospardan tys tekseristiń bastalǵanyn habarlady. Ekologiialyq retteý jáne baqylaý komitetiniń tóraǵasy Jomar Álievtiń aitýynsha, zerthanalyq taldaý kezinde Qarakólge tógilip jatqan sýdyń quramynda ziiandy zattardyń shamadan tys mólsheri anyqtalǵan.
"Sonyń negizinde "Rixos Aktau" qonaq úiine qatysty jospardan tys tekseris bastaldy. Tekseristiń nátijesi boiynsha tártip buzýshylarǵa qatysty tiisti sharalar qabyldanady, ákimshilik ister qozǵalady ", - deidi Áliev.
Aita keteri, Qarakóldegi aqqýlardyń qyrylǵany týraly aqparat 27 jeltoqsanda tarai bastady. Bas kezinde mamandar 30 qustyń óleksesi tabylǵanyn aitqan. Alaida jergilikti bloger Azamat Sársenbaev áleýmettik jelide post jariialap, qyrylǵan aqqýlardyń sany áldeqaida kóp ekenin málimdedi. Osydan keiin statistika jańartyldy. 227 aqqýdyń óleksesi tabylǵanyn týraly aqparat shyqty.
