Aqtaý qalasynyń ákimine qoqys shyǵarý jumystaryn durys uiymdastyrmaǵany úshin sógis jariialandy, dep habarlaidy "Ult aqparat" Mańǵystaý oblysy ákiminiń baspasóz qyzmetine silteme jasap.
"9 tamyzda aimaq basshysy Nurlan Noǵaevtyń qatysýymen ótken apparattyq keńeste qalalar men aýdandardaǵy qatty turmystyq qaldyqtar shyǵarý jáne sanitarlyq tazalyq máselesi qaraldy.
Óńirde sanitarlyq jaǵdai jáne eldi mekenderdegi qatty turmystyq qaldyqtardy ýaqytynda shyǵarý máselesi ózekti. Mańǵystaýdyń tarihi-mádeni oryndaryn jáne tabiǵaty kórikti jerlerin týrister de, turǵyndar da tamaq qaldyqtarymen lastap jatyr. Sońǵy ýaqytta oblys ortalyǵynyń turǵyndary tarapynan túsetin qoqystyń jinalýyna qatysty shaǵymdardyń sany da aitarlyqtai ósti" - delingen habarlamada.
Turmystyq qaldyqtardyń ýaqytynda shyǵarylmaýy qalaǵa jaqyn mańda ornalasqan Munaily aýdany jáne Túpqaraǵan aýdanyna qarasty Aqshuqyr aýylynyń turǵyndaryn alańdatyp otyr.
- Eldi mekenderdiń sanitarlyq jaǵdaiy - alańdatarlyq másele. Aqtaý qalasynyń lastanýyna jol berýge bolmaidy. Telegram chatqa túsetin shaǵymdardyń kópshiligi qoqys jinaý jáne shyǵarý máselesimen bailanysty. Qaldyqtardy ýaqtyly jinamaý qalanyń kórki men turǵyndardyń densaýlyǵyna keri áserin tigizedi. Bul - qala ákimi jumysynyń durys uiymdastyrylmaýynyń nátijesi, - dep atap ótti Nurlan Noǵaev.
Jumysty durys uiymdastyrmaǵany úshin aimaq basshysy Aqtaý qalasynyń ákimine, onyń orynbasaryna jáne TÚKSh bóliminiń basshysyna sógis jariialady.
