Aqsý qant zaýytynda jańa maýsymǵa daiyndyq júrip jatyr. Bul jumystardyń barysyn Almaty oblysy ákiminiń orynbasary Serikjan Beskempirov kórip qaitty.
Zaýyttaǵy qalpyna keltirý jumystary 18 mamyrdan bastaldy. Qazirgi kezde tsehtar tazalanyp, tozǵan bólshekter jańasyna aýystyrylýda. Buǵan deiin «Jetisý» ÁKK» ÓDI» AQ arqyly jalpy sany 288 birlik aýyl sharýashylyǵy tehnikalary men qural-jabdyqtar satyp alynyp, «Aqsý Qant» JShS-ǵa lizingige berilgen bolatyn. Seriktestikke kadr tartý maqsatynda «Aqsý Qant» JShS men jergilikti politehnikalyq kolledj arasynda 50 qajetti arnaiy maman daiyndaý týraly kelisimshart jasalǵan.
S.Beskempirovtiń aitýynsha, qazir kásiporynda 120 adam jumys isteidi, jazǵy maýsymda taǵy 100 adam eńbekke tartylady, al iske qosylǵanda zaýytqa 600-dei adam eńbek etedi: «Kórip turǵanymyzdai, jalpy jóndeý jumystary jospar boiynsha júrip jatyr. Biylǵy jyly «Jetisý» ÁKK-niń qoldaýymen zaýyt shamamen 20 qyrkúiekte iske qosylady», - dedi oblys ákiminiń orynbasary.
Óz kezeginde kásiporyn direktory Samat Nadirbaevtyń aitýynsha, biylǵy jyly qant qyzylshasynyń syǵyndysyn keptirýge arnalǵan syǵyndy keptirgish jáne jomdy untaqtaǵysh jeli ornatylyp, iske qosýǵa daiyn tur. Kásiporyn irgesin odan ári keńeitý ashytqy zaýyty men qurama jem shyǵaratyn zaýyt salý arqyly júzege asyrylmaq: «Zaýyttaǵy protsesterdi avtomattandyrý men óndiristiń shikizattyq júiesin júzege asyrý jumystaryn júrgizýge múmkindik bar, bul zaýyttyń jyl boiy úzdiksiz jumys isteýine, aýdan turǵyndaryn jumyspen qamtýǵa oń yqpalyn tigizedi», - dedi S.Nadirbaev.
Atap ótsek, biylǵy jyly Aqsý aýdanynda 3 167 gat jerge qant qyzylshasy sebilgen, onyń 300 gektary qant zaýytyna tiesili. Jalpy oblys boiynsha tátti túbir 6 100 ga jerge sebildi.
Jalpy Aqsý qant zaýyty 2017 jyldyń qyrkúiek aiynda iske qosylǵan. Óndiristik qýattylyǵy 300 myń tonna qant qyzylshasyn óńdeýge jetedi, iaǵni bir maýsymda 35 myń tonnaǵa deiin qant shyǵara alady. Kásiporyn óńirdegi óńdeýshi «qanatqaqty» óndiris orny. Zaýytqa shikizat qant qyzylshasy baǵatyndaǵy 17 servistik daiyndaý ortalyǵynan jáne oblystaǵy qyzylsha ósirýshi 200-den astam sharýashylyqtan jetkiziledi.
Almaty oblysynyń ákiminiń baspasóz qyzmeti
