Aqsha aýdarymdaryn fiskalizatsiialaý tek kásipkerlerge qatysty bolady. Bul týraly Qarjy ministrligi habarlady.
«Qoldanystaǵy mobildi banking qyzmetteri jeke adamdar arasyndaǵy qolma-qol aqsha ainalymynyń kóp bóligin qolma-qol emes ortaǵa kóshirýge úlken serpin berdi. Jeke tulǵalardyń mundai jeke aýdarymdary Qazaqstan Respýblikasy Qarjy ministrliginiń MKK ákimshiligine jatpaidy jáne ondai aýdarymdarǵa salyq salynbaidy», - dep túsindirdi Qarjy ministrliginiń baspasóz qyzmeti.
Ministrliktiń habarlaýynsha, sońǵy ýaqytta mundai jeke transfertterge arnalǵan EDB jańa qyzmetteri kásipkerler arasynda da keń qoldanysqa ie boldy, iaǵni taýarlar, jumystar men qyzmetter úshin tólemder qolma-qol aqshasyz saýdalana bastaǵan.
«Sondyqtan, aqsha aýdarymdaryn fiskalizatsiialaý jáne mundai aýdarymdardy onlain-kassalyq mashina arqyly júzege asyryp, keiinnen salyq eseptiliginde kórsetý mańyzdylyǵy zor.
Ózderińiz biletindei, búgingi tańda shaǵyn jáne shaǵyn kásipkerlik sýbektileri 2023 jylǵa deiin tabys salyǵynan bosatyldy. Osy ýaqytqa deiin salyq organdary arnaiy salyq rejimderin jetildirýmen qatar jedel aýdarymdardy jeke maqsattar jáne biznes úshin dep ekige bólý tetikterin ázirleýi kerek.
Búgingi tańda usynylǵan sheshimderdiń biri - kásipkerlik qyzmetke arnalǵan jeke shotty paidalaný», - dep tolyqtyrdy Qarjy uiymy.
Aita ketý kerek, ekinshi deńgeili bankter qazirdiń ózinde uqsas mobildi qosymshalardy jasap shyǵardy jáne olardy iskerlik ortada tanymal etý úshin belsendi jumys júrgizilýde.
Sondai-aq, qarastyrylǵan sheshimderdiń arasynda táýekelderdi basqarý júiesin ázirleý de usynyldy. Bul júie kásipkerlik sýbektisi retinde tirkelmei júrgizilgen kommertsiialyq operatsiialardyń belgilerin jáne bizneste jeke shottaryn qoldanǵan kásipkerlerdi anyqtaidy.
