Amerikanyń Tennesi shtatynyń gýbernatory Ýiliam Li seisenbi kúni shtattyń ortalyq bóligine kelgen eki tornadodan qaza tapqandar sany 25 adamǵa jetkenin málim etti. Tennesidiń eń úlken qalasy Neshvillde tornado úiler men ǵimarattardy qiratty, dep habarlaidy BBC.
Amerikalyq BAQ daýyl tún ortasynda bolǵandyqtan, kóptegen adamdardyń panalap úlgermegenin habarlady.
Prezident Donald Tramp juma kúni shtatqa barýdy josparlap otyrǵanyn málim etti.
Gýbernator Li birneshe adamnyń iz-túzsiz joǵalyp ketkenin baspasóz máslihatynda aitty.
Turǵyndardyń biriniń aitýynsha, Neshvill «áskeri qaqtyǵystar aimaǵyna» uqsap ketken.
Tabiǵi apattan Neshvillden shyǵysqa qarai 130 shaqyrym qashyqtyqtaǵy Pýtnem okrýgi qatty zardap shekken. Munda tornado 19 adamnyń ómirin jalmaǵan.
Ýilson okrýginde úsh adamnyń, ekeýi Devidson jáne biri Bentonda qaza tapqany habarlandy.
Neshvill meri Djon Kýper qalanyń «qańyrap» qalǵanyn aitty jáne adamdardy «kórshilerge kómek qolyn sozýǵa» shaqyrdy.
Mer Kýperdiń aitýynsha, 150 zardap shegýshi meditsinalyq mekemege jetkizilgen.
Qalada izdeý-qutqarý jumystary júrip jatyr. 44 myńǵa jýyq adam jaryqsyz qalyp, áýejai qyzmetine kedergi keltirgen.
Resmi ókilder qaladaǵy mektepterdiń, sottar men avtoparkterdiń jabylatynyn jariialady.
