Aq Jaiyq jurtshylyǵy La-Mansh buǵazyn júzip ótken oraldyq Ánel Sytdyqovany qoshemetpen qarsy aldy, dep habarlaidy QazAqparat.
Áýejaidan túsken boida suhbat bergen Ánel Álibekqyzy óziniń alǵa qoiǵan bir maqsatyn oryndaǵanyn jetkizdi.
- Men buǵan tórt jyldai ázirlendim. 2016 jyly alǵashqy áreketim daýyldyń kóterilýine bailanysty sátsiz aiaqtaldy. Degenmen alǵan betimnen tanbadym, - dedi Ánel – Sóitip 21 tamyz kúni La-Mansh buǵazyn Angliiadan Frantsiiaǵa deiin 34 shaqyrymdy júzip óttim. Túngi saǵat 02.00-de bastalǵan bul saparym 15 saǵat 15 minýtqa sozyldy.
- Ánel, osynshama qashyqtyqty gidrokostiýmsiz 16 gradýs salqyn sýda júzip ótý ekiniń biriniń qolynan kele bermeidi. Onyń ústine talap ta qatań ǵoi?
- Iá, bul ońai asý bolǵan joq. Meniń triatlonmen ainalysqanyma toǵyz jyl boldy. Ondaǵy biraz biikti baǵyndyrǵannan keiin triatlonnyń eń qiyn da aýyr bóligi – júzýge den qoidym. Men buǵan kesh kelsem de, aldyma aiqyn maqsat qoidym. Qazaqstanda kásibi sportshylar az emes, biraq olar osy kezge deiin La-Mansh buǵazyn júzip ótpegen eken. Munyń birneshe sebepteri bar. Eń aldymen sý óte salqyn ári uzaq ýaqyt boiy júzýge týra keledi, aldyńnan ne kútip turǵanyn bilmeisiń, júrektilik te kerek. Qarjy da qajet. Bapkerim, máskeýlik Sergei Lenivkin jaqsy kómektesti, ol daiyndaǵan taǵy eki adam La-Mansh buǵazyn júzip ótti. Sosyn qaiyqta tóreshi, assotsiatsiia ókili boldy, ol erejeniń saqtalýyn baqylap otyrady. Qaiyqqa, adamdarǵa jaqyndaýǵa bolmaidy. Toqtamai júzip, jaǵaǵa shyqqannan keiin doping-baqylaýdan ótesiń. Osy talaptardyń báriniń údesinen shyqtym. Sóz reti kelgende, aita keteiin, Angliiada júzýmen ainalysatyndar az emes. Olar muny ádettegi hobbi sanaidy, La-Mansh buǵazyn birneshe ret júzip ótkender bar.
- Endigi arman-maqsattaryń qandai?
- Alda AQSh-ta taǵy osyndai eki uzaq qashyqtyqty júzip ótsem deimin. Onyń biri – Katalina buǵazy (35 shaqyrymdai). Ekinshisi – Manhetten arqyly 20 kópirdi júzip ótý. Bul, qatelespesem, 60 shaqyrymdai qashyqtyq. Sonda úsh márte uzaq qashyqtyqty júzip óter edim. Endi, buiyrsa, soǵan daiyndalamyn. Eń bastysy, adam aldyna maqsat qoia bilse, qandai asýdy da baǵyndyra alady. Mysaly, men ózim bárin 100 paiyz oryndaǵandy jaqsy kóremin. Ár minýtym esepteýli deýge bolady. Tańerteń balalarym sabaqta bolǵan kezde júzýmen ainalysamyn. Olardy mektepten alyp kelgen soń otbasyma kóńil bólemin.
- Jalpy, otbasyńda jolyńdy qýǵandar bar ma? Sportqa qushtarlyqty kimnen aldyń?
- Joldasym Nurlanmen birge úsh ul tárbielep otyrmyz. Olar kásibi túrde ainalyspaǵanmen, denesin shynyqtyrǵandy jek kórmeidi. Ata-anam da sporttan alys emes. Men ózim mundai qushtarlyqty Nurziia atty óte pysyq ájemnen aldym dep oilaimyn.
***
Aita keteiik, Áneldiń ákesi, qurylys salasynda tájiribesi mol, óńirde basshylyq qyzmetter atqarǵan Álibek Baqtygereiuly voleibolmen turaqty ainalysady. Al anasy, matematik-ustaz Qanapiia Muhambetqyzy shańǵyǵa beiim.
- Ánel biz Tasqala aýdanynda turǵan kezde dúniege keldi. Kishkentai kezinen Derkól ózenine aparyp júrdim. Sonda mektepke bardy, keiin Oralda oqydy. Qyzymyzdyń alǵan betinen qaitpaitynyn biletinbiz. Osy joly júzip ótpese, báribir keleside taǵy áreket jasar edi. Árine, qaýipti bolǵandyqtan, qatty qobaljydyq. Bári sátti aiaqtalǵanyna qýanyshtymyz, - dedi Qanapiia Muhambetqyzy.
Eske sala keteiik, budan buryn Qazaqstan Prezidenti Qasym-Jomart Toqaevtyń La-Mansh buǵazyn júzip ótken Ánel Sytdyqovany quttyqtaǵanyn jazǵan bolatynbyz.
