AQSh-taǵy násilshildikke qarsy jappai narazylyqty kúsheite túsken kisi ólimi jóninde jańa derek paida boldy. Atlanta politsiiasynyń qolynan 12 maýsym kúni qaza tapqan qara násildi Reishard Brýkstyń arqasyna eki oq tigeni habarlandy.
14 maýsym kúni Meditsinalyq ekspertiza ortalyǵy Brýkstyń arqasyna eki oq tiip, úlken kólemde qan joǵaltý jáne aǵza músheleriniń jaralanýy saldarynan kóz jumǵanyn anyqtady. Ortalyq Brýkstyń qazasyn kisi óltirý dep baǵalady.
Sońǵy eki jarym aptada AQSh-ta jáne álemniń kóptegen elinde politsiianyń qatygezdigine jáne násildik teńsizdikke qarsy narazylyq aktsiialary ótip kelgen bolatyn. Bul narazylyq Minneapolis turǵyny qara násildi Djordj Floid politsiia qolynan qaza tapqannan keiin bastalǵan. Tolqýlar endi báseńdei bastaǵanda Brýkstyń ólimi narazylyqqa kúsheitip jiberdi.
13 maýsymnyń keshinde narazylar Brýks qaza tapqan restoranǵa órt qoiyp, sol mańdaǵy kólik jolyn bógep tastady. Politsiia narazylardy kózdi jasaýratatyn gazben tarqatty.
Atlanta politsiia departamenti Brýksty atqan aq násildi qyzmetkerin jumystan shyǵaryp, onyń oqiǵa ornynda bolǵan áriptesin ákimshilik jumysqa aýystyrdy. Politsiia bastyǵy Erika Shilds qyzmetinen ketti.
Oqiǵa 12 maýsym kúni keshki ýaqytta boldy. Politsiiaǵa Wendy’s dámhanasynyń janyndaǵy joldy bir kóliktiń bógep turǵany jáne júrgizýshiniń kólik ishinde uiyqtap jatqany jóninde shaǵym túsken. Shaǵym boiynsha kelgen politsiia kólik júrgizýshiniń mas-mas emestigin tekserip, onyń ishimdik ishkenin anyqtaidy da, tutqyndamaq bolady.
Politsiia qyzmetkeriniń kamerasyna túsken videoǵa sáikes, tutqyndaý kezinde Brýks qarsylyq tanytyp, politsiia qyzmetkeri oǵan qarsy elektroshoker qoldanbaq bolady. Brýks onyń elektroshokerin julyp alyp, qashyp ketedi. Odan keiin Brýkstyń qashyp bara jatyp artynan qýǵan politsiia qyzmetkerin elektroshokermen atqany kórinedi. Sol mezette politsiia Brýkske oq atyp, jerge qulatady. Brýks aýrýhanada kóz jumǵan.
Brýks otbasynyń advokaty Kris Stiýart oq atqan politseige “qarýdy negizsiz qoldanyp, kisi óltirdi” degen aiyp taǵylýy tiis dep sanaidy.
“Elektroshoker adam ómirine qaýipsiz qarý deisiz... biraq qalai elektroshoker qara násildi azamattyń qolyna túsip edi, solai ol qaýipti qarýǵa ainala keldi”, dedi ol politsiia qyzmetine qarata sóilep.
AP, AFP, Fox News Atlanta jáne Reuters agenttikteriniń aqparaty negizinde ázirlendi.
