Amerika Qurama Shtattarynda sársenbi kúni Pfizer Inc kompaniiasynyń COVID-19-ǵa qarsy preparaty (PFE.N) maquldandy. Ol qatty aýyrý qaýpi bar 12 jastan asqan adamdarǵa arnalǵan. Ony úi jaǵdaiynda em qabyldaý kezinde qoldanýǵa bolady. Bul, sonymen qatar, tez taralyp jatqan «omikron» shtamyna qarsy jańa qural retinde usynyldy, dep habarlaidy QazAqparat Reuters-ke silteme jasap.
Pfizer kompaniiasynyń klinikalyq zertteýiniń derekterine sai, Paxlovid antivirýstyq preparaty 90% tiimdiligin kórsetken. Sońǵy zerthanalyq derekter boiynsha, preparat «omikron» shtamymen kúresýge de jaramdy.
«Preparattyń maquldanýy – mańyzdy qadam, ol COVID-19 infektsiiasyn basqarýǵa kómektesedi», dedi Djons Hopkins Densaýlyq saqtaý institýtynyń aǵa ǵylymi qyzmetkeri Amesh Adalia.
«Alaida bul oraida eki másele týyndaidy: aldaǵy aptalarda preparat az bolady, ony tiimdi qoldaný tez diagnostikany talap etedi, al bul koronavirýsqa test tapsyrýdaǵy turaqty problemalardyń saldarynan qiynǵa soǵady».
Pfizer kompaniiasynyń habarlaýynsha, 180 000 em kýrsyna arnalǵan preparat osy jyly jiberýge daiyn tur. Kompaniia men AQSh úkimeti otyrǵan kelisim-shart boiynsha, ár kýrs 530 dollarǵa baǵalanyp otyr. Úkimet 10 million em kýrsyna arnalǵan preparat suratqan.
Preparat tek retseptpen beriledi. Dárini qabyldaý koronavirýs simptomdary baiqalǵan kezden bastap bes kúni boiy ár 12 saǵat saiyn qabyldap otyrý kerek.
