Amerikanyń Nebraska shtatynyń densaýlyq saqtaý salasynyń ókilderi elektrondy temekiden qaitys bolǵan alǵashqy adam týraly málimdedi. Al búkil elde veiping qurbandarynyń sany 14-ke jetti, dep habarlaidy CNN.
Nebraska shtaty Densaýlyq saqtaý jáne áleýmettik qyzmet ministrliginiń málimdeýinshe, Dýglas okrýginde turatyn 65 jastaǵy er adam biyl mamyrda qaitys bolǵan. Al jazda elektrondy temeki tartýdan indet taraǵany týraly resmi jariialandy.
Veiping Kaliforniia shtatynyń eki turǵynyn jalmaǵan, sondai-aq Kanzasta eki adam, Oregonda taǵy eki adam veiping qurbany bolǵan. Budan bólek, Illinois, Indiana, Minnesota, Missýri, Florida, Missisipi jáne Djordjiia shtattarynyń bir-bir turǵyny elektrondy temekiden zardap shekken.
AQSh-tyń aýrýlarǵa qarsy kúres ortalyqtary 46 shtatta jáne Virginiia araldarynda 805 adamnyń ókpesi elektrondy temekiden zaqymdanǵanyn málimdedi.
Ulttyq sipat alǵan indettiń naqty sebebi áli anyqtalǵan joq.
Dárigerlerdiń boljaýynsha, oǵan veip quramyndaǵy tetragidrokannabinol, marihýanadaǵy esirtki zattar sebep bolýy múmkin.
