AQSh memlekettik departamenti 11 qańtarda Soltústik Koreiadan Reseige ballistikalyq raketa tasymaldaýǵa qatysy bar úsh reseilik uiym jáne bir jeke tulǵaǵa sanktsiia saldy. Bul jóninde AQSh memlekettik hatshysy Entoni Blinken málimdedi, - dep habarlaidy Azattyq radiosy.
"Biz ári qarai da sharalar qoldana beremiz", - dedi Blinken málimdemesinde.
AQSh jáne odaqtastary 9 qańtardaǵy ortaq málimdemesinde Soltústik Koreia men Resei áskeri arasyndaǵy qarý-jaraq almasýdy aiyptaǵan. Málimdeme avtorlary Resei 30 jeltoqsan jáne 2 qańtarda Ýkrainaǵa jappai soqqy jasaǵan kezde soltústikkoreialyq raketalardy paidalanǵanyn da sókken.
Jýyrda AQSh-tyń ulttyq qaýipsizdik jónindegi ókili Djon Kirbi Soltústik Koreianyń Reseige raketa tasymaldaýyna "alańdaýshylyq bildirip", qarý tasymaldaýǵa qatysy barlarǵa qosymsha sanktsiia salynatynyn aitqan edi.
Buǵan deiin The Wall Street Journal basylymy Resei Soltústik Koreiadan ballistikalyq raketalar men tiisti qondyrǵylaryn satyp alǵan bolýy múmkin dep habarlaǵan. Máskeý Irannan da osyndai qarý túrin alýǵa kúsh salyp otyr.
Soltústik Koreiada sovettik úlgidegi R-17 raketa keshenderi bar. Ol qazir "Hvason-6" dep atalady. Batys sarapshylarynyń pikirinshe, ol 500-1300 shaqyrymǵa ushýy múmkin.
Phenian áskeri paradtarynda batysta KN-23 degen atpen belgili shamamen 700 shaqyrymǵa deiin ushatyn Reseidiń "Iskanderine" uqsas keshenderin kórsetken. Al, shamamen 380 shaqyrymǵa ushatyn KN-25 raketalary 2019 jyly synaqtan ótken.
Buǵan deiin Máskeý Resei Soltústik Koreiadan raketa satyp alǵany jóninde aqparatty teristegen.
