AQSh Siriianyń soltústiginde áskeri operatsiiaǵa kirisken Túrkiianyń qorǵanys ministrligi men energetika ministrligine jáne osy eki ministrliktiń basshylaryna sanktsiia saldy.
AQSh memlekettik hatshysy Maik Pompeonyń málimdemesine qaraǵanda, Prezident Donald Tramp qol qoiǵan jarlyq boiynsha qarjy ministrligi men memlekettik departament Siriianyń soltústigindegi turaqtylyq pen beibit ómirge nuqsan keltirýge qatysy bar Túrkiianyń kez kelgen memlekettik qurylymy men jeke tulǵalaryna sanktsiia sala alady.
Pompeonyń málimdemesinde ótken aptada kúrdterge qarsy bastalǵan Túrkiianyń áskeri operatsiiasy terrorizmmen kúreske nuqsan keltirip, Siriiadaǵy beibit adamdar ómirine qater tóndiretini aitylǵan. AQSh Túrkiiadan áskeri operatsiiany dereý toqtatýdy talap etedi.
AQSh prezidenti Siriianyń soltústiginen AQSh áskerin shyǵarý jaily sheshimin Twitter paraqshasynda aqtai sóilep, AQSh Siriiadaǵy mindetin oryndaǵanyn, siriialyqtardy túrik áskerinen qorǵaý nieti joqtyǵyn málimdedi.
Túrkiia Siriianyń soltústiginde bastaǵan áskeri operatsiiasyn «óz shekarasyn terororisterden qorǵaý» dep túsindiredi.
Dúisenbide Siriia kúrdteriniń jetekshileri Damask biligimen kelisim jasasqany belgili bolǵan edi. Osydan keiin Bashar Asad áskeri Túrkiia shabýylynan qorǵaý úshin Siriianyń kúrdter baqylaýyndaǵy birneshe eldi mekenine kirgen. Kúrd jasaqtarynyń jetekshileri kelisimge amalsyzdan barǵanyn málimdegen.
