AQSh jáne Ulybritaniia Iemendegi hýsitterdiń áskeri nysandaryna soqqy jasady, - dep habarlady Reuters. Bul - AQSh-tyń Iemendegi hýsitterge 2016 jyldan beri alǵash ret jasaǵan shabýyly.
Vashingtondaǵy tórt resmi derekkóz Reuters agenttigine AQSh resmi málimdemeni "jýyq arada" jasaitynyn jáne áskeri operatsiianyń jai-japsarymen tanystyratynyn jetkizdi.
BBC aqparat agenttiginiń habarlaýynsha, AQSh jáne Ulybritaniia aviatsiiasy men áskeri kemeleri 12 qańtarǵa qaraǵan túni Iemendegi kóterilisshi-hýsitterge soqqy jasai bastaǵan. Iran qoldaýyna ie hýsitter keiingi kezde Qyzyl teńizdegi saýda kemelerine shabýyldy údetken edi.
Taiaý Shyǵystaǵy aqparat quraldarynyń jazýynsha, soqqy portty Hodeida qalasy men Iemen astanasy Sana halyqaralyq áýejaiyndaǵy nysandarǵa jasalǵan.
Soqqy jóninde AQSh prezidenti Djo Baiden jáne Ulybritaniia premer-ministri Rishi Sýnak ta málimdeme jasady.
Arnaiy málimdemesinde prezident Baiden AQSh pen odaqtastarynyń operatsiiasyn Iemendegi hýsitterdiń Qyzyl teńizdegi saýda kemelerine jasaǵan shabýylyna "teńdessiz" jaýap dep atady. Soqqyny AQSh jáne Ulybritaniianyń áskeri teńiz kúshteri jasaǵan. Olardy Avstraliia, Bahrein, Kanada, Niderlandy qoldaǵan.
BAQ-tyń jazýynsha, soqqy ushaq, sý ústi jáne sýasty kemelerinen jasalǵan. "Tomagavk" qanatty zymyrany da paidalanylǵan. Radiolokatsiialyq stantsiialar men drondar qoimasyna soqqy jasalǵan.
Iemenniń basym bóligin baqylaýda ustap otyrǵan hýsitter HAMAS-qa (keibir elderde terroristik uiym dep tanylǵan) qoldaý retinde aimaqtaǵy teńiz joldaryna shabýyldap jatyr. Hýsitterdiń shabýyly Eýropa men Aziia arasyndaǵy mańyzdy saýda baǵyttaryn buzǵan. Túrli keme kompaniialary aimaqtaǵy jumysyn toqtatqan.
Iemenniń Hodeida qalasynyń úsh turǵyny Reuters agenttigine beisenbi kúni qalada hýsit kúshteri men áskeri júk kólikteriniń tez qozǵalysyna bailanysty áýe dabyly iske qosylǵanyn aitqan. Hodeidadaǵy hýsitterdiń áskeri nysandary men lagerleri de evakýatsiialanyp jatyr.
Amerika áskeri 11 qańtarda hýsitter 19 qarashadan beri 27-ret kemege shabýyl jasaǵanyn, Aden shyǵanaǵyndaǵy halyqaralyq teńiz joldaryna kemelerdi joiatyn ballistikalyq raketa jibergenin málimdedi.
Osy aptada AQSh jáne Ulybritaniianyń áskeri-teńiz kúshteri hýsitter Qyzyl teńizdiń ońtústigine jibergen drondar men raketalardy atyp túsirgen.
Iemenniń basym bóligin basyp alǵan hýsitter azamattyq soǵys kezinde Izrail nemese soǵan qatysy bar kemelerge shabýyl jasaýǵa ýáde bergen. Alaida shabýylǵa ushyraǵan kemelerdiń kóbi Izrailge qatysy joq.
Beisenbi kúni hýsitterdiń jetekshisi AQSh-tyń hýsitterge qarsy kez kelgen shabýyly "jaýapsyz qalmaitynyn" aitqan.
Aita keteiik, buǵan deiin Ulybritaniia men AQSh Iemendegi hýsitterdiń áskeri nysandaryna soqqy jasaýǵa daiyn ekenin málimdegen. Sondai-aq sársenbide AQSh memlekettik hatshysy Entoni Blinken hýsitterdiń áreketiniń saldary bolady dep aitqan. Al Ulybritaniia qorǵanys ministri Grant Shepps jýrnalisterge "oqiǵany qadalaýǵa" keńes berdi.
