AQSh pen Qytaidyń resmi tulǵalary kelesi aptada Aliaskada joǵary deńgeide kelissóz ótkizedi. Bul Djo Baiden prezidenttikke kelgeli beri álemdegi eń iri ekonomika ieleriniń joǵary deńgeidegi alǵashqy diplomatiialyq kezdesýi bolmaq.
18 naýryzda AQSh memlekettik hatshysy Entoni Blinken men ulttyq qaýipsizdik jónindegi keńesshi Djeik Sallivan Qytaidyń syrtqy saiasat jónindegi iri diplomaty Ian Tszechi men syrtqy ister ministri Van Imen Ankoridjde kezdesedi. Bul jóninde Aq úidiń 10 naýryz kúngi málimdemesinde aitylǵan. Baiden ákimshiligi ózine deiingi Donald Tramp ákimshiliginiń Qytaiǵa qatysty qatań saiasatyn jalǵastyrady degen boljam aitylyp jatqan shaqta taraptar kóptegen máselelerdi talqylaidy.
Keiingi kezde saýda daýy, Gonkongtegi demokratiialyq qozǵalystardyń basyp-janshylýy, AQSh genotsid dep ataǵan Shyńjań aimaǵynda musylman toptardyń qýdalanýy, Qytai áskeriniń Taivan men Ońtústik Qytai teńizindegi áreketi máseleleri tóńireginde eki el arasynda jaǵdai ýshyǵyp ketken. Biraq Soltústik Koreianyń iadrolyq baǵdarlamasyna tosqaýyl qoiý, Mianmadaǵy áskeri tóńkeriske toitarys berý jáne ǵalamdyq klimattyń ózgerýi máselelerinde AQSh Qytaimen áriptestik ornatý joldaryn da izdeidi.
"Pekinniń qimyl-áreketteri AQSh pen odaqtastarynyń qaýipsizdigi, órkendeýi men qundylyqtaryna qaýip tóndirip otyr. Sol sebepti bul biz úshin kóptegen alańdaýshylyqtarymyzdy ashyq talqylaityn mańyzdy múmkindik" dedi Blinken 10 naýryzda.
