AQSh-tyń Ortalyq barlaý basqarmasy munan bylai negizgi baǵytyn terrorizmmen kúresten góri Qytaiǵa kóbirek aýdaratyn bolady. Associated Press-tiń habarlaýynsha, bul jaiynda OBB direktorynyń orynbasary Devid Koen terrorizmmen kúres bóliminiń jetekshilerimen jabyq kezdesýde aitqan, dep jazady Azattyq.
Koen sózinshe, AQSh terrorister sońyna túsýin toqtatpaidy, biraq endigi negizgi basymdyq — Pekindi tereńirek túsinip, oǵan qarsy turýǵa tyrysý bolady. "Osy maqsatqa qarjy kóbirek bólinip, ózge salalarǵa, sonyń ishinde terrormen kúres salasyna bólinetin aqsha qysqara bastaidy" deidi AR derekkózderi. Barlaý biýdjeti qupiia bolǵandyqtan, tsifrlardy naqtylaý múmkin emes.
"Ortalyq barlaý basqarmasynda "typ-tynysh tóńkeris boldy", Qytai jónindegi mamandar men buryn terror qaýpine bailanysty jumys istegen júzdegen qyzmetkerdi laýazymdy qyzmetterge aýystyrýǵa kiristi. Agenttik ishinde kóptegen adamdar qytai tilin úirenip jatyr jáne Ortalyq barlaý basqarmasy da qytai tilin biletinderdi jumysqa kóbirek tarta bastady" dep jazady AR.
AQSh Qytaidyń ósip kele jatqan saiasi jáne ekonomikalyq ambitsiiasyna kópten beri alańdap keledi. AQSh Pekindi "Amerikadaǵy sailaýǵa yqpal etýge tyrysty, kibertyńshylyqpen shuǵyldandy, Shyńjańdaǵy musylman azshylyqty, milliondaǵan uiǵyrdy lagerge qamady" dep aiyptaidy. Munan ózge AQSh taiaý jyldary Pekin Taivandy kúshpen basyp alady dep qaýiptenedi.
Ortalyq barlaý basqarmasynyń ókilderi Qytai týraly neǵurlym kóbirek aqparat kerek ekenin, óitkeni COVID-19 indetiniń sebebin túbegeili anyqtai almaǵanyn habarlaǵan. Virýstyń qaidan shyqqany sol kúii belgisiz bolyp qaldy. Munan ózge Ortalyq barlaý basqarmasy Qytaidyń qandai jańa tehnologiia oilap taýyp jatqany jaily kóbirek bilgisi keledi. AQSh Qytaidyń kvant ǵylymyna, jasandy intellekt pen ózge de tehnologiiaǵa trilliondaǵan investitsiia salyp jatqany - kóp uzamai ekonomika qurylymy men soǵys tásilderin ózgertip jiberýi múmkin dep sanaidy.
Ortalyq barlaý basqarmasynyń negizgi basymdyqtardy ózgertkenin eki partiia ókilderi de, barlaý qyzmetiniń burynǵy qyzmetkerleri de qoldaidy.
Ókilder palasatynyń múshesi, Aýǵanstan men Irakta qyzmet etken, burynǵy áskeri reindjer Djeison Kroý keiingi jyldary AQSh terrorizmmen kúreske tym shuqshiyp ketti dep sanaidy.
“Odan góri Resei men Qytai áldeqaida úlken ekzistentsialdy qater tóndirip tur”, — deidi Kroý. Onyń sózinshe, amerikalyq ómir obrazyn terror toptar emes, Qytai buzýy múmkin”.
