Foto: russianskz.info
Qazaqstanǵa sanktsiia salynady degen qaýip joq. Bul týraly Syrtqy ister ministriniń orynbasary Almas Aidarov málimdedi, dep habarlaidy Sputnik Qazaqstan.
Ortalyq kommýnikatsiialar qyzmetinde ótken baspasóz máslihatynda jýrnalister AQSh Qyrǵyzstanǵa sanktsiia salǵaly jatqanyn eske salyp, Qazaqstan da osyndai problemaǵa tap bolmai ma dep surady.
Aidarov Reseige qarsy alǵash ret sanktsiia salynǵaly beri Qazaqstan bul protsesti belsendi baqylap otyrǵanyn atap ótti.
"Biz sanktsiiadan jaltarý úshin arnaiy áreketke barmaitynymyzdy únemi aityp júrmiz. Biraq Reseimen dástúrli ekonomikalyq bailanysymyzdy jalǵastyryp kelemiz. Biz eshteńe jasyrmaimyz. Sol sebepti qazir sońǵy sanktsiialar paketinde bizdiń kompaniialarǵa, Qazaqstanǵa qatysty qaýip kórip turǵan joqpyz", - dedi Syrtqy ister ministriniń orynbasary.
Ol SIM Qazaqstanǵa qatysty sanktsiia engizýge eshqandai alǵyshart kórip turmaǵanyn aitty.
"Sońǵy pakette mundai joq. Biz Qazaqstan táýekel aimaǵyna kirmeýi úshin aldyn alý jumystaryn júrgizdik. Biz barynsha ashyqpyz jáne yntymaqtasýǵa daiynbyz", - dedi Aidarov.
Ol ótken jyldan bastap Qazaqstan Reseige áskeri maqsattaǵy taýarlardy jetkizýge múlde tyiym salǵanyn atap ótti. Al qos maqsattaǵy taýarlar boiynsha sertifikattaý engizilgen, iaǵni taýardy shyǵarý úshin arnaiy litsenziia qajet. Buǵan qosa elektrondy shot-faktýralar arqyly Qazaqstan aýmaǵy arqyly nemese Qazaqstannan jetkiziletin barlyq sanktsiialyq taýar qadaǵalanady.
"Eger biz osyndai táýekelderdi baiqasaq, eshqandai tarihy joq, bir kúndik kompaniialar anyqtalyp jatady. Olardy toqtatý úshin sharalar qabyldaimyz. Sonymen qatar memlekettik kirister komitetiniń barlyq júiesinde táýekelderdi basqarý júiesi engizilgen. Ol jańa sanktsiialyq talaptarǵa bailanysty jańa bilimdermen tolyǵady. Júie bir kúndik kompaniialar men firmalardy anyqtaidy, olardy toqtatý jumysy júrgiziledi", - dedi Aidarov.
