Amerika Qurama Shtattary koronavirýs indetin juqtyrǵandary eń kóp álemdegi úsh eldiń qataryna qosyldy.
Mundai derekti el biliginiń, Dúniejúzilik densaýlyq saqtaý uiymynyń jáne ózge de resmi derekkózderdiń málimetterine súiene otyryp, shynaiy jaǵdaiǵa esep júrgizip otyrǵan Djons Hopkins ýniversiteti keltiredi, dep habarlaidy TASS agenttigi.
Atalǵan ýniversitettiń derekterine sáikes, Qytaida koronavirýs juqtyrýdyń 81 321 oqiǵasy tirkelgen. Bul rette 3 260 adam qaza taýyp, 71 862 adam jazylyp shyqqan.
Italiiada virýs juqtyrǵandar sany - 53 578 adam. Onyń ishinde 4 825 adam kóz jumsa, jazylyp shyqqany qazirgi ýaqytta 6 072 adam ǵana. Al AQSh-ta osy ýaqytta 25 493 adamnyń virýs juqtyrǵany anyqtalyp otyr. Qaza tapqandar sany - 307, emdelgenderi - 171 adam. Qurama Shtattardan keiingi virýs eń kóp taraǵan elderdiń qatarynda Ispaniia (25,3 myń), Germaniia (22,2 myń) jáne Iran (20,6 myń) memleketteri tur.
Jalpy, atalǵan ýniversitettiń málimetterine sáikes, búginde álemde 304,5 myń adam koronavirýs juqtyrǵany belgili. Dál osy virýstan qaitys bolǵandardyń sany 13 myńǵa jýyqtap qaldy. Al virýstan saýyqqandardyń sany 91,6 myńnan asyp jyǵylady.
