Qazaqstan men AQSh klimattyń ózgerýimen kúres máselelerin talqylady. Atap aitqanda, AQSh Aral teńizi problemalaryn sheshýge, Qazaqstannyń kómirtekti beitaraptyqqa jetý bastamasyna, birlesken jobalardy júzege asyrýǵa qoldaý bildirýge nietti, dep habarlaidy "Ult aqparat".
Bul týraly Qazaqstan Respýblikasy Prezidentiniń halyqaralyq áriptestik jónindegi arnaiy ókili Erjan Qazyhanov pen QR Ekologiia, geologiia jáne tabiǵi resýrstar ministri Maǵzum Myrzaǵalievtiń AQSh Prezidentiniń klimat jónindegi arnaiy ókili Djon Kerrimen ótken ekijaqty onlain kezdesýinde aityldy.
Qazaqstan ókilderi kómirtekti beitaraptyqqa jetý boiynsha qabyldanyp jatqan sharalar, jańa Ekologiialyq kodekstiń normalary jóninde aqparat berdi. Sonymen qatar dástúrli energetikalyq resýrstardyń mol ekenine qaramastan, Qazaqstan Parij kelisiminiń maqsattaryna belsendi umtylyp jatqanyn atap ótti.
Budan bólek, «jasyl» qarjylandyrý jobalary aiasynda AQSh-pen áriptestik aiasyn keńeitýge qyzyǵýshylyq tanytyldy.
Djon Kerri Qazaqstannyń klimattyń ózgerýi máseleleri boiynsha qyzmetin joǵary baǵalap, Prezident Q.J. Toqaev ótken jyly jeltoqsanda klimattyq ambitsiialar Sammitinde aitqan maqsattar men mindetterdi atap ótti.
«Habtyń qyzmetin aimaq elderiniń «jasyl ekonomikalyq» ósimdi qamtamasyz etý jolynda kúsh biriktirýine, «jasyl» tehnologiialar transfertine, bilim almasýǵa jáne halyqaralyq institýttar tarapynan qarjy tartýǵa baǵyttaýǵa bolady», - dedi vedomstvo basshysy.
Bul turǵyda AQSh Prezidentiniń Arnaiy ókili sýtek óndirisiniń dástúrli energiia kózderine balama retinde keleshegi zor baǵyt ekenin atap ótti.
Budan bólek, Qazaqstan tarapy osy kúzde Túrkistan qalasynda C5+1-ke qatysýshy elderdiń Ekologiia ministrleriniń kezdesýin ótkizý týraly bastama kóterdi. Bul bastamany AQSh tarapy qoldap, aimaqtyq dialog aiasynda jumys qarqynyn arttyrýdyń mańyzdylyǵyn atap ótti.
Áńgime barysynda taraptar Aral teńizin qalpyna keltirý taqyrybyn jáne Qazaqstan men Ortalyq Aziiadaǵy basqa da problemalardy qozǵady.
Amerikalyq áriptesterge Qazaqstannyń investitsiialyq áleýeti týraly aitylyp, geologiia, jasyl energetika jáne jańa tehnologiialar salasynda birge júzege asyrýǵa bolatyn birqatar joba usynyldy.
Usynylǵan bastamalar AQSh tarapynan jaqsy qabyldandy. Kezdesý qorytyndysy boiynsha taraptar atalǵan baǵytta birlesken jumysty jalǵastyrýǵa kelisti.
