AQSh áskeri drony. Kórneki sýret.
28 tamyzda AQSh Aýǵanstannyń shyǵysynda "Islam memleketi" (IM) ekstremistik toby múshesin dronmen atyp, kózin joiǵan. Bul áskeri operatsiia Kabýl áýejaiy mańynda ózin jaryp jiberip, 170 aýǵan azamaty men 13 AQSh sarbazyn mert qylǵan jankeshti shabýylynan keiin eki kún ótpei jatyp jasalǵan, dep habarlaidy Azattyq radiosy.
Osyǵan deiin AQSh prezidenti Djo Baiden Kabýl áýejaiyna shabýylǵa jaýapkershilikti moinyna alǵan IM tobynan AQSh kek alady dep ýáde etken.
AQSh ortalyq qolbasshylyǵynyń habarlaýynsha, Aýǵanstannyń Nangarhar ýálaiatynyń shyǵysynda dron shabýylynan IM tobynyń "Horasan ýálaiaty" atty bólimshesindegi bir "josparlaýshy" qaza tapqan.
"Alynǵan alǵashqy derekterge qaraǵanda, biz nysanaǵa alynǵan adamnyń kózin qurttyq" dep málimdegen AQSh qarýly kúshteriniń kapitany Bill Ýrban.
Tamyz aiynyń ortasynda "Taliban" qozǵalysy Aýǵanstanda bilikti basyp alǵan soń Kabýl halyqaralyq áýejaiynda bastalǵan (NATO-ǵa múshe elder azamattary men osy elderge kómek bergen aýǵandardy) evakýatsiialaý operatsiiasy áli jalǵasyp jatyr.
Aq úi ókili Djen Psaki 27 tamyzda sóilegen sózinde, AQSh ulttyq qaýipsizdik sarapshylary taǵy bir "shabýyl bolýy yqtimal" ekenin jáne aldaǵy birneshe kún "osy kezge deiingi eń qaýipti kezeń" bolatynyn basa aitty.
NATO-ǵa múshe odaqtas elderdiń taǵy birnesheýi Aýǵanstandaǵy operatsiiasyn aiaqtady. IM shabýylynan soń, AQSh jetekshilik etetin adamdardy evakýatsiialaý missiiasy aqyrǵy kezeńine aiaq basty. Óz azamattary men aýǵan azamattaryn Kabýldan ushaqpen tasymaldaýǵa qatysqan 20-dan astam odaqtas eldiń kópshiligi 27 tamyzǵa deiin evakýatsiiany aiaqtaǵany jaily habardar etken.
