Beisenbi kúni AQSh Dúniejúzilik densaýlyq saqtaý uiymynyń basshylyǵyna koronavirýs infektsiiasynyń paida bolýyn zertteýdiń ekinshi kezeńin ótkizýdi usyndy.
Bul, sonymen qatar, táýelsiz mamandarǵa Qytaida ótkizilip jatqan taldaýlar men bastapqy derekterdi berýdi qarastyrady, dep habarlaidy Reuters.
Ýhan qalasynda qytailyq zertteýshilermen birge tórt apta bolǵan Dúniejúzilik densaýlyq saqtaý uiymynyń toby naýryz aiynda óziniń esebinde virýstyń janýarlar arqyly jarqanattardan adamdarǵa juǵýy múmkin ekenin aitqan.
Sonymen qatar, olardyń aitýynsha, juqtyrýdyń zerthanalyq jylystaný saldarynan bolýy ekitalai.
Jenevadaǵy BUU-nyń amerikalyq missiiasynyń ókili beisenbi kúni óziniń málimdemesinde DDSU júrgizgen koronavirýs infektsiiasynyń paida bolýyna qatysty zertteýlerdiń birinshi kezeńin «jetkiliksiz jáne dálelsiz» dedi. Ol zertteýlerdiń ekinshi kezeńin ótkizýge qolqalap, jedeldikke, ashyqtyqqa jáne jetkilikti kólemdegi derekterdi berýge shaqyrdy.
«Qytaidyń táýelsiz zertteýshilerge virýs pen pandemiianyń paida bolý kózine qatysty bastapqy derekter men taldaýlardy usynýy mańyzdy», - delingen habarlamada.
Óz kezeginde, beisenbi kúni AQSh-taǵy Qytai elshiliginiń ókili álem boiynsha tirkelgen koronvirýs infektsiiasynyń barlyq erte oqiǵalaryna tolyq zertteý júrgizýge, sonymen qatar álem boiynsha keibir jasyryn bazalar men biologiialyq zerthanalardy egjei-tegjeili zertteýge shaqyrdy.
Jenevadaǵy BUU-daǵy Britaniia elshili Saimon Menli de jedel, ashyq jáne dálelderge negizdelgen zertteýlerdiń ekinshi kezeńin júrgizýge shaqyrdy.
Sársenbi kúni bolǵan densaýlyq saqtaý ministrleriniń jyl saiynǵy kezdesýi kezinde DDSU-nyń jetekshi sarapshysy Maik Raian múshe eldermen zertteýlerdiń ekinshi kezeńiniń mazmuny týraly keńesý ótkizilgenin aitty. Onyń aitýynsha, uqsas talqylaýlar taǵy aldaǵy aptalar kezinde jalǵasyn tappaq.
