Ýhan virýsologiia institýty.
AQSh barlaý qyzmeti koronavirýs "janýardan adamǵa juqty" nemese "zerthanadan tarady" degen boljamnyń qaisysy durys ekenin aitýǵa qinalady. Juma kúni AQSh barlaý qyzmetiniń keńsesi taratqan esepten osyny ańǵarýǵa bolady, dep habarlaidy Azattyq.
Eseptegi málimetke qaraǵanda, AQSh barlaý vedomstvosy mamandarynyń virýs tegine bailanysty pikiri ekige jarylǵan, alaida sarapshylar virýs biologiialyq qarý retinde jasaldy degen tujyrymǵa senýge beiil emes.
Esepke súiengen "Amerika daýysy" saitynyń jazýynsha, Qytaidyń Ýhan qalasyndaǵy virýsologiia institýty koronavirýsty jasaýǵa atsalysqanmen qolda bar málimetter negizinde SARS Cov-2 genetikalyq turǵyda ǵalymdar qurastyrdy ma, joq pa, ol jaǵyn naqty aitý qiyn.
Ýhan zerthanasy ókilderiniń 2019 jyly qarashada tynys aýrýlaryn emdeý úshin dárigerlerden kómek suraýy "pandemiianyń tegine" meńzemeidi.
Qazirgi kezde Qytai koronavirýstyń tegin anyqtaýǵa bailanysty halyqaralyq zertteý júrgizýge qarsylyq tanytyp otyr jáne Ýhan virýsologiia institýtynyń derek qorymen bólisýge de qulyqty emes. Institýttyń biozerthana qaýipsizdigin qamtamasyz etý máseleleri tóńireginde sybys-aiań kóp.
Qytaidyń Vashingtondaǵy elshiligi málimdeme taratyp, atalǵan esep virýstyń tegi jaily ǵylymi negizdelgen zertteýlerge bóget jasap, virýstyń tegin anyqtaýǵa kedergi keltiredi dedi.
