Pentagon Aýǵanstandaǵy AQSh azamattary men AQSh-pen yntymaqtasa jumys istegen aýǵan azamattaryn evakýatsiialaýǵa kómektesý úshin áskeri kontingentin 6 myńǵa deiin jetkizedi. Bul málimetti "Amerika daýysy" AQSh prezidenti Djo Baiden ákimshiliginiń keibir qyzmetkerlerine súiene otyryp habarlady.
Jeksenbi kúni aýǵan astanasynyń turǵyndary Kabýldyń Hamid Karzai atyndaǵy halyqaralyq áýejaiy tóńireginde atys bolyp jatqany jaily habar taratqan.
AQSh azamattary men AQSh-pen yntymaqtastyqta jumys istegen aýǵan azamattarynyń negizgi bóligi osy áýejaidan evakýatsiialanady.
15 tamyzda tálipter Aýǵanstannyń shyǵysyndaǵy mańyzdy qala Jalalabadty soǵyssyz alǵan. Onyń aldynda Mazari-Sharif qalasyn alǵanyna bir táýlik te ótpegen. Aýǵan úkimetiniń baqylaýynda iri qalalardan tek Kabýl ǵana qalǵan.
Aýǵanstan prezidenti Ashraf Ǵani 14 tamyzda teleúndeý jasap, keiingi 20 jyldyń "jetistigin" qorǵaýǵa ýáde etken.
2001 jylǵy 11 qyrkúiektegi terror shabýylynan keiin AQSh Aýǵanstanǵa basyp kirip, "Talibandy" bilikten ketirgen. AQSh áskeri biyl mamyrdan bastap elden shyǵaryla bastady. Sodan beri "Taliban" belsendiligin arttyryp, aýǵan aýdandary men qalalaryn birinen keiin birin basyp alyp jatty.
