AQSh prezidenti Djo Baiden Aq úide jýrnalister aldynda sóilep tur. 31 tamyz 2021 jyl.
Seisenbi, 31 tamyz kúni Aq úi Aýǵanstannan ketkisi kelgen amerikalyqtardyń 98 paiyzy evakýatsiialanǵanyn, AQSh prezidenti Djo Baidenniń qalǵan 100-200 azamatqa elden ketý isinde kómektesýge daiyn ekenin málimdedi, dep habarlaidy Azattyq.
Aq úide jýrnalister aldyna sóz sóilegen Baiden Aýǵanstanda qalǵan amerikalyqtardyń kóbinde eki azamattyq bar ekenin, olardyń Aýǵanstanda týystary bolǵanyn aitty.
"Qalyp qoiǵan amerikalyqtarǵa ýaqyt qoiylyp otyrǵan joq. Eger olar ketkisi kelse, kómektesýge daiynbyz" dedi Baiden.
Baiden óz sózinde Aýǵanstannan ketkisi kelgen amerikalyqtardyń 90 paiyzy evakýatsiialandy degen. Biraq Aq úi onyń sóziniń transkriptsiiasyn túzetip, atalǵan kórsetkishti 98 paiyz dep ózgertti.
AQSh prezidenti sondai-aq memlekettik hatshy Entoni Blinkenniń tálipter qolyna ótken Aýǵanstannan amerikalyqtardy, AQSh elshiligine qyzmet etken aýǵandardy jáne sheteldikterdi alyp ketý jóninde diplomatiialyq kelissózder júrgizip jatqanyn aitty.
Baiden halyqaralyq qaýymdastyqtyń elden shyǵý erkindigine kepildik bergen "Talibandy" sózinde turýyn qadaǵalaitynyn málimdedi.
AQSh áskeri evakýatsiia operatsiiasyn 14 tamyzda, tálipter Kabýlǵa kirerden bir kún buryn bastaǵan. Sodan beri 5,5 myńnan astam AQSh azamaty, odaqtas elderdiń myńdaǵan azamaty, AQSh elshiliginde jumys istegen 2,5 myń aýǵan azamaty men olardyń otbasylary, aýdarmashy jáne ózge de qyzmetti atqarǵan myńdaǵan aýǵan evakýatsiialanǵan.
