Senbi kúni keshke AQSh-tyń Kanaveral múiisindegi ailaqtan ushyrylǵan bortynda NASA-nyń eki astronavty bar Crew Dragon ǵarysh kemesi orbitaǵa sátti shyqty. Ol Halyqaralyq ǵarysh stantsiiasymen Grinvich ýaqyty boiynsha jeksenbi kúni kúndizgi saǵat 15:29-da túiisýi tiis (Almaty ýaqytymen keshki saǵat 20:29).
Crew Dragon 2011 jyldan bergi AQSh ushyryp otyrǵan ushqysh arqyly basqarylatyn alǵashqy keme. 9 jyl buryn AQSh kóprettik Space Shuttle kemelerin ushyrý baǵdarlamasyn toqtatqan bolatyn.
BBC saitynyń jazýynsha, Falcon 9 zymyranynyń alǵashqy bóligi ushyrylǵannan keiin shamamen úsh minýttan soń bólingen. Al 10 minýttan soń Atlant muhityndaǵy SpaceX-tiń arnaiy platformasyna qaita oralǵan. Dragon kemesi Halyqaralyq ǵarysh stantsiiasyna óz qozǵaltqyshymen jetýi tiis.
Zymyrannyń ekinshi bóligi bólingennen soń ushyrýdy basqarý ortalyǵy jáne ekipaj músheleri bir-birin sátti ushýmen quttyqtady. NASA Dragon kemesiniń orbitaǵa aman-esen shyqqanyn habarlady.
Keme ekipajynda 53 jastaǵy Daglas Hiorli men 40 jastaǵy Robert Benken bar. Ekeýi de - áýe áskeri kúshteriniń ardager sarbazdary. Buǵan deiin ǵaryshqa eki ret ushqan.
Olar halyqaralyq ǵarysh stantsiiasynda keminde 30 kún bolady. Demo-2 missiiasy - SpaceX kompaniiasynyń tehnologiiasyn tekserý boiynsha júrgizilgen sońǵy synaq. Eger sátti aiaqtalsa, Crew Dragon Halyqaralyq ǵarysh stantsiiasyna turaqty túrde ushady.
Crew Dragon - NASA-ǵa arnap shyǵarylǵan ushqyshpen basqarylatyn jalǵyz ǵarysh kemesi emes. Kúzde Boeing korporatsiiasynyń balama Starliner kemeleri ushyrylýy tiis. 2019 jyl jeltoqsan aiyndaǵy sátsiz synaqtan soń kelesi keme ushqyshsyz basqarylmaq.
NASA josparyna sáikes, Crew Dragon men Starliner 20 ǵasyrdyń 60-jyldary shyǵarylǵan reseilik "Soiýz" kemelerin almastyrýy tiis. 2011 jyldan beri Qazaqstan teriitoriiasyndaǵy Baiqońyr ailaǵynan ushyrylyp júrgen reseilik "Soiýz" kemeleri amerikalyq astronavtarǵa Halyqaralyq ǵarysh stantsiiasyna jetýdiń jalǵyz joly bolǵan.
